Улс оронд өндөржүүлсэн бэлэн байдлын зэрэгт шилжүүлсэн энэ цаг үед 2020-2021 оны хичээлийн шинэ жил эхлэх гэж байна. Тус газарт хичээлийн шинэ жил эхлэхтэй холбогдуулан хувийн хэвшлийн ерөнхий боловсролын сургуульд суралцагч хүүхдүүдийн эцэг, эхчүүдээс сургалтын төлбөртэй холбоотой асуудлаар гомдол, санал ихээр ирж байна. Энэ асуудлаар Монгол Улсын Боловсрол, шинжлэх ухааны сайдын 2020 оны А/17 дугаар тушаал, Монгол Улсын Шадар сайд, Сангийн сайд, Хөдөлмөр, нийгмийн хамгааллын сайд, Боловсрол, шинжлэх ухааны сайд, Эрүүл мэндийн сайд нарын хамтарсан 2020 оны 78, 149, А/164, А/14, А/391 дугаар тушаалуудаар тодорхой зохицуулж, үүрэг болгосон. Мөн Шударга өрсөлдөөн, хэрэглэгчийн төлөө газраас Боловсрол, шинжлэх ухааны яамны Төрийн нарийн бичгийн даргад 2020 оны 08 сарын 18-ны өдрийн 01/1304 дугаартай зөвлөмжийг хүргүүлсэн.
Хэрэглэгчийн эрхийг хамгаалах тухай хуулийн 11 дүгээр зүйлийн 11.1-т “Хэрэглэгч, үйлдвэрлэгч, гүйцэтгэгч бараа худалдах, худалдан авах, нийлүүлэх, ажил гүйцэтгэх, үйлчилгээ үзүүлэх тухай гэрээг бичгээр болон амаар хийж болно.”, 11.2-т “Хэрэглэгчтэй байгуулсан гэрээний нөхцөл нь хэрэглэгчийн эрхийг хамгаалах тухай энэ хууль болон бусад хууль тогтоомжоор тогтоосон нөхцөлөөс дордуулсан бол хүчин төгөлдөр бус байна.” гэж заасан байдаг.
Гэрээний стандарт нөхцөл хүчин төгөлдөр бус байх үндэслэлийг Иргэний хуулийн 202 дугаар зүйлд “Стандарт нөхцөлийг гэрээнд тусгасан ч тэр нь харилцан итгэлцэл, шударга ёсны зарчимд харш, уг нөхцөлийг хүлээн зөвшөөрөгч нөгөө талдаа хохиролтой бол уг нөхцөл хүчин төгөлдөр бус байна.” гэж заасан.
Эцэг эхчүүдээс удаа дараа гаргаж байгаа гомдол, санал дээрх хууль тогтоомж, шийдвэрүүдийг үндэслэн хувийн хэвшлийн ерөнхий боловсролын сургуулийн удирдлагуудад дараах ЗӨВЛӨМЖ -ийг хүргүүлж байна. Үүнд:
Монгол Улсын Засгийн газраас улс оронд шинэ короновирусийн халдвараас урьдчилан сэргийлэх, эрсдэлийг бууруулах чиглэлээрх арга хэмжээг шат дараалан авч хэрэгжүүлж байгаа цаг үеийг зөв үнэлж, төр засгийн бодлогыг дэмжиж, иргэд хэрэглэгчдэд аль болох хүндрэл, бэрхшээл учруулахгүйгээр асуудлыг шийдвэрлэх бүх талын боломжийг судалж, хэрэгжүүлж ажиллах, хамтран ажиллах гэрээний гол нөхцөл, стандарт нөхцөлүүдийг холбогдох хууль тогтоомжид нийцүүлэн, хэрэглэгчийн эрхийг дордуулахгүй байхаар гэрээг боловсруулах;
Салбарын сайд нарын баталсан дээрх тушаал, шийдвэрүүдийг хэрэгжүүлэх ажлын хүрээнд дараах арга хэмжээг авч ажиллах,
а/ эцэг, эхчүүдтэй гэрээ байгуулахдаа сургалтын төлбөрийн асуудлаар зөвхөн сургуулийн захиргаанаас урьдчилан бэлтгэсэн гэрээний нөхцөл /төсөл/-ийг тулгадаг арга барилыг таслан зогсоох,
б/ сургалтын төлбөрийн хэмжээ, төлөх хугацааг эцэг эхчүүдийн саналыг үндэслэн харилцан зөвшилцөж гэрээнд тусгах,
в/ сургалтын төлбөрийг 2019-2020 оны хичээлийн жилд мөрдсөн төлбөрийн хэмжээнээс нэмэгдүүлэхгүй байх,
г/ сургалтын төлбөртэй холбоотой асуудлаар шалтгаалан суралцагч хүүхдийг сургуулиас хасах, сургууль завсардуулах асуудал гаргахгүй байх.
Суралцагчийн эцэг эх, асран хамгаалагчтай гэрээ байгуулах үйл явцад Иргэний хуулийн 189 дүгээр зүйлийн 189.1, 196 дугаар зүйлийн 196.1.2-т тус тус заасны дагуу талууд гэрээг бичгээр байгуулахаар урьдчилан тохиролцож, гэрээний саналыг зөвшөөрснөө илэрхийлсэн тохиолдолд гэрээг байгуулсанд тооцох зэргээр хуульд заасны дагуу гэрээний талуудын чөлөөт байдлыг хангаж ажиллах зэрэг болно.