Харин ч Халхын голын дайны түүхэн ялалтыг өгүүлэх хөшөө дурсгалууд улам өнгө зүс орж, сүрлэг дагшнаар өнгөрснийг өгүүлнэ.
Дорнод аймгийн Халх гол сумын Хамар даваанд орших 54 метр өндөр, 33 метр өргөн, 110 тонн жинтэй, аранжин зэс бүхий Ялалт хөшөө, Баянцагааны нуруунд байрлах Ерэн баатрын хөшөө, Баянцагааны тулалдаанд баатарлаг гавьяа байгуулсан танкийн 11 дүгээр бригад, түүний командлагчийн дурсгалыг хүндэтгэсэн М.П.Яковлевын хөшөө, 1939 оны 6 дугаар сарын 28-нд дайралтад өртөн олон арваараа амь үрэгдсэн 8 дугаар дивизийн 22 дугаар морьт хороо, монгол цэргүүдийн дурсгалд зориулсан Монгол дайчдын хөшөө, Ханан хөшөө, Илдэт хөшөө... нэр нь хүртэл түүхийг өгүүлэх хөшөө дурсгалуудад Халхын голын түүхт ойн хүндэт зочид төлөөлөгчид, нутгийн ард түмэн цэцэг өргөж, хүндэтгэл үзүүлсэн юм.
Дайны гал голомт болж байсан Халх гол сумынхан энэ өдрүүдэд хөл хөдөлгөөн ихтэй байлаа. Тэдний хувьд, нэг сайхан мэдээ нь Монгол Улсын ерөнхийлөгч, Зэвсэгт хүчний ерөнхий командлагч Ц.Элбэгдоржийн зарлигаар Халхын голын дайны ялалтын 75 жилийн ойг тохиолдуулан тус сумыг “Цэргийн гавьяаны улаан тугийн одон”-гоор шагнасныг нутгийн ард олон уухайлан талархаж, хүлээн авлаа.
Халхын голын дайнаас төрсөн Дорнод аймгийн харьяат хоёр ахмад дайчин байдаг бөгөөд ерэн насыг давж яваа Цэвэгийн Дорж, Гончигийн Хандам гуай нар энэхүү хүндэтгэлийн ажиллагааны хүндтэй эзэд байлаа. Чухамдаа олон зочид гийчид бужигнаад, хөл хөдөлгөөн болоод байгаагийн учрыг төдийлөн сайн ойлгоогүй ч хоёр буурай маань цагтаа тэсрэх бөмбөг, исгэрэх сумнаас бэргэлгүй, аавын олон хөвгүүд, охидтой хамтдаа Халхын голын ялалтыг авчралцсан эрхэм гавьяатнууд билээ.