“Оюутан цэрэг” хөтөлбөрт хамрагдан цэргийн албанд татагдан ирсэн дайчдын цэргийн тангараг өргөх ёслолын ажиллагаа өнөөдөр Чингисийн талбайд боллоо.
Ёслолын ажиллагаанд Монгол Улсын Ерөнхийлөгч, Зэвсэгт хүчний Ерөнхий Командлагч Ц.Элбэгдорж, Монгол Улсын Их Хурал, Засгийн газрын гишүүн, Батлан хамгаалахын сайд Д.Бат-Эрдэнэ, БХЯ-ны Төрийн нарийн бичгийн дарга, хошууч генерал З.Болдбаатар, ЗХЖШ-ын дарга, дэслэгч генерал Ц.Бямбажав, Монголын оюутны холбооны ерөнхийлөгч Х.Батсайхан нар болон БХЯ, ЗХЖШ-ын удирдлага, албаны бусад хүмүүс, цэргийн тангараг өргөхдайчид, тэдний ар гэрийн төлөөлөл хүрэлцэн ирсэн байна.
Байлдааны жанжин туганд хүндэтгэл үзүүлж, эр цэргийн тангараг өргөх энэхүү хүндтэй ажиллагааг Батлан хамгаалахын сайд Д.Бат-Эрдэнэ нээж, анхны “Оюутан цэрэг”-үүддээ баяр хүргээд, “Эрч хүчтэй, эрдэм билэгтэй залуус улс орны маань хөгжил дэвшлийн түүчээ билээ. Тэр дундаа, оюун ухаанаа хөвчлөн, мэргэжил боловсрол эзэмшин буй оюутан залуус бидний хамгийн үнэтэй өв хөрөнгө юм. Тиймээс төр засгаас та бүхэндээ цаг хугацаа, хөрөнгө мөнгө, нөхцөл боломж бүхий ухаалаг хөрөнгө оруулалт хийж, энэхүү хөтөлбөрийг санаачлан хэрэгжүүлж байна.
Зуны амралтынхаа хугацаанд цэргийн албаа хааж, жинхэнэ цэрэг эрс болон жагссан анхдагч “Оюутан-цэрэг”-үүд та бүхэндээ онцгойлон талархал илэрхийлье.
Эх орныхоо төлөө итгэл зүтгэл, зориг тэвчээр, бүр амиа ч өгөхөд бэлэн хэмээн тангараглаж, хаана ч, хэзээ ч албаа нэр төртэй хаадаг хамгийн хийморьлог салбарын эгнээ та бүхнээр өргөжин тэлсэнд бахархаж байна. Цэргийн албаа хаасан оюутан та бүхний өмнө олон боломж бололцоо бий болж байна. Гагцхүү түүнийг хэрхэн үр ашигтай, хэрэгтэйгээр зарцуулах нь таны хандлага, авхаалж самбаа, хөдөлмөр зүтгэлээс хамаарна.
Миний Монголын залуу хүн бүр эх орон, тусгаар тогтнолынхоо үнэ цэнийг мэддэг, зэр зэвсэгтэй харьцаж чаддаг, бие бялдар сайтай, эх орныхоо дөрвөн зүг, найман зовхисын түүх шаштирыг мэддэг, эх оронч үзэлтэй, эх орны цэрэг болж төлөвших болтугай” хэмээгээд, цаашдынх нь хичээл сурлага, ажил амьдрал, хүсэл мөрөөдөлд нь амжилт хүссэн юм.
Мөн энэхүү хөтөлбөрийг санаачлагч Монгол Улсын ерөнхийлөгч, Зэвсэгт хүчний командлагч Ц.Элбэгдорж хэлсэн үгэндээ, цэргийн тангараг өргөнө гэдэг бол зүгээр нэг ёслол биш. Тангараг өргөсөн эр цэргийн зүрхэнд эх орон жинхэнэ ёсоор багтдаг. Учир нь цэргийн тангараг эх орны үнэтэй, цэргийн тангараг амины үнэтэй. Түүнийг зөрчих, тангаргаасаа няцах эрх хэнд ч байхгүй. Би энэ үгийг тангараг өргөсөн цэрэг хүний хувьд хэлж байна. Би бол Монгол хүн бүр цэргийн алба хаах ёстой гэж боддог хэмээн онцолсон юм. Тэрбээр цааш нь, Та бүхэн Оюутан цэрэг хөтөлбөрөөр амьдралд хэрэгтэй хамгийн чухал зүйлсэд суралцаж байгаа. Дэг журам, бие биедээ туслах, олонтойгоо эетэй ажиллаж амьдрах ухаан, хүний үгийг даах чадвар, тэвчээртэй байх, сахилга зохион байгуулалт гээд олон чухал чадваруудад суралцаж байна. Энэ бол хамгийн чухал амжилт юм. Та бүхэн өмнө нь ээж аавын хүү байсан бол одоо эх орны хүү болж байна. Энэ бол иргэн хүн бүрийн эзэмших ёстой, дээдлэх ёстой зүйл. Эх орноо хайрлах гэвэл эр цэргийг хайрлах хэрэгтэй. Эх орноо хайрлая гэвэл эр цэргээ бэлтгэх хэрэгтэй. Эх орноо хайрлая гэвэл эр цэрэг болох хэрэгтэй, цэргийн алба хаах хэрэгтэй.
Та бүхэн эх орон гэдэг хосгүй үнэт ойлголтыг энэ богинохон хугацаанд сайн ойлгосон гэж итгэж байна. Эх орноо хамгаалахад суралцах, эр цэрэг байх бол монгол хүн бүрийн давах ёстой даваа. Монгол хүн бүрийн эзэмших ёстой сургууль юм. Ийм байдлаар цаашид энэ хөтөлбөр өргөжих болно.
Та нарын ойр дотны хүмүүс, эцэг эх, гэр бүл, найз нөхөд тань та бүхнийг хоёр сарын дотор ямар хурдан өөрчлөгдөж болдгийг харж байгаа. Цэргийн албанд мордоогүй найз нөхдөөсөө яаж өөрчлөгсдөнийг ч харж байгаа гэсэн юм.
“Оюутан-цэрэг” хөтөлбөрт хамрагдан цэргийн тангараг өргөсөн дайчдыг төлөөлөн Шинжлэх ухаан технологийн их сургуулийн 1 дүгээр дамжааны оюутан Ч.Баярбилэг мөн сэтгэгдлээ хуваалцаж, үе тэнгийн залуусаа эр цэргийн албаа заавал хаахыг уриалсан билээ.
“Оюутан цэрэг” хөтөлбөрийн эхний ээлжинд хамрагдаж, “Цэргийн ерөнхий бэлтгэл” хичээл /2 кредит 96 цаг/-ээр онолын мэдлэгээ эзэмшин шалгалт өгч, эрүүл мэндийн үзлэгт ороод тэнцэж, улмаар“Цэргийн тусгай бэлтгэл” сургалтанд хамрагдсан нийслэлийн есөн дүүргийн, 42 их дээд сургуулийн нэгдүгээр дамжааны 418 оюутан-цэрэг өнөөдөр ийнхүү тангаргаа өргөж байна.
Тэд 2014 оны 4 дүгээр сарын 15-наас хоёр сарын турш “Цэргийн ерөнхий бэлтгэл” хичээлийг танхимаар үзэж судласан бөгөөд 6 дугаар сарын 15-наас 8 дугаар сарын 15-ны өдрийг хүртэл мөн хоёр сарын хугацаанд Зэвсэгт хүчний 119 дүгээр ангийн сургалтын төвд хээрийн байрлалд 12 кредит буюу 560 цагийн есөн төрлийн хичээлийг судалж байгаа юм.
Оюутан-цэргүүд цэргийн анхан шатны бэлтгэл сургалт болон цэргийн мэргэжлийн бэлтгэлийн хичээлүүдийг судалсан юм. Тухайлбал, тактик, цэргийн дүрэм, биеийн тамир, жагсаал, холбооны бэлтгэл, инженерийн бэлтгэл, үй олноос хамгаалах зэвсгийн бэлтгэл, амьд гарах арга ухаан, галын бэлтгэл хичээлүүдийг мэргэжлийн багш нар өдөрт 10 цагаар заан, хичээллэж байна.
“Оюутан цэрэг” сургалтын төвийн даргаар 119 дүгээр ангийн захирагч, хурандаа Д.Энхбаатар, “Оюутан цэрэг” сургалтын төвийн штабын даргаар дэд хурандаа С.Жаргалсайхан нар ажиллаж байна. Сургалтын төвийн бүх багш нар Олон улсын энхийг сахиулах ажиллагаанд явсан туршлагатай офицерууд юм.