Эх орныхоо даалгаврыг өвөрлөн, дэлхийн хүн төрөлхтөний энх амгалангийн манаанд нэр төртэй зүтгэж яваа эрхэм офицер, ахлагч, цэнхэр дуулгатан-энхийг сахиулагч та нартаа Энхийг сахиулагчдын өдрийн халуун мэнд хүргэн мэндчилье. Өнөөдөр НҮБ-ын 116 гишүүн орны 120 гаруй мянган энхийг сахиулагчдад хүндэтгэл үзүүлэх, талархал илэрхийлэх, тэдний гавьяа зүтгэлийг үнэлэх, олон нийтэд алдаршуулах Олон улсын энхийг сахиулагчийн өдөр тохиож байна. Хамтын аюулгүй байдлыг сахин хангаж буй НҮБ-ын энхийг сахиулах ажиллагааны үнэ цэнэ, түүнд дэлхий нийтээр итгэх итгэл үнэмшил өдрөөс өдөрт өсөн нэмэгдэхэд миний Монгол цэргүүд тэргүүлэх хорин орны нэг болон гялалзаж яваад монгол хүн бүр уухайлан бахархаж байна.
Нэгдсэн Үндэстний Байгууллага болон мөр зэрэгцэн энхийн манаанд зогсоо бусад орны цэрэг дайчид төдийгүй нөмөр нөөлөг, хамгаалалт горилон халуун амь, гэгээн итгэлээ дайж ирэх энгийн номхон нутгийн ард түмэнд Монгол цэргийн суу алдар, монголын ард түмний хүнлэг, тусч сэтгэлийг дуурсган байгаа та бүхнээрээ үргэлж бахархаж байдаг.
Үймээн самууны хөлд нэрвэгдсэн, үгүйрэл гуйланчлал, өлсгөлөн ноёлсон, дарийн утаа үнэртэж, дайны уршиг үргэлжилсэн дэлхийн халуун цэгт бид эрэлхэг хөвгүүд, охидоо илгээсээр байгаа нь Монгол Улс Нэгдсэн Үндэстний Байгууллагын өмнө хүлээсэн үүргээ биелүүлж, монголын ард түмэн дэлхийн ахан дүүстэй амьсгалах агаар, цохилох зүрх, булгилах цусан нэг гэдгээ дахин нотолж, энх амгалангийн төлөө зорилго нэг болохоо харуулсан чухал үйл явдал юм.
Эрсдэл, түгшүүр бүхий амаргүй орчин нөхцөлд цэргийн тангарагаар хүлээсэн үүргээ ийнхүү маш сайн биелүүлж, Монгол цэргийн ур чадвар, бие сэтгэлийн тэсвэр хатуужил, улс орон, ард түмнийхээ бахархам түүх, нэр хүндийг өндөрт өргөж, албаа сайн хааж байгаа манай зэвсэгт хүчний бие бүрэлдэхүүн энхийг сахиулагчид та бүхэндээ Монголын төр, ард түмэн, Батлан хамгаалах яам, Зэвсэгт хүчний Жанжин штабын удирдлага, жагсаал нэгт анд нөхөд, анги, салбарын хамт олон, гэр бүл, ойр дотныхон тань гүн хүндэтгэл үзүүлж, талархал бахархлаа илэрхийлж байна.
Дэлхий дахины энхийн үйлс, улс орныхоо тусгаар тогтнол, ард иргэдийн эрх, эрх чөлөөт байдлыг хамгаалан бэхжүүлэх аз хийморьтой, онцгой энэхүү албандаа улам их амжилт олохыг Эрэлхэг дайчин хөвгүүд, охид, Монгол цэргийн суу алдрыг хөглөн уухайлагч энхийг сахиулагч Та бүхэндээ чин сэтгэлээсээ хүсэн ерөөе.Монгол төрийн алтан сүлд, ялан дийлж явсан монгол цэргийн хийморь золбоо ямагт ивээж явах болтугай. Хурай...