Нийслэлийн Засаг даргын санаачилгаар Нийслэлийн Засаг даргын Тамгын газар, Зэвсэгт хүчний Жанжин штаб, Хил хамгаалах Ерөнхий газар, Онцгой байдлын Ерөнхий газартай хамтран Улаанбаатар хотын цэргийн хүрээний анги, байгууллагуудын дунд тэргүүний тохижилттой, жагсаалч анги, хамт олныг шалгаруулах “Монгол цэргийн жавхаа” уралдааныг 2 дахь жилдээ амжилттай зохион байгууллаа. Өнгөрөгч хоёрдугаар сараас эхэлсэн тус уралдаанд 29 анги, байгууллага оролцсоноос Зэвсэгт хүчний 120, 353, 032, 017, 150, 311 дүгээр анги, БХИС, Хилийн цэргийн 0151, 0164 дүгээр ангиуд төгсгөлийн шатанд шалгарч, Эзэн Чингисийн талбайд шилдгийн төлөө өрсөлдлөө. Хаврын тэнгэр аашаа сэлгэн хуйсганаж, хайруу салхи хавирга нэвтлэх мэт жиндүүлж байсан авч эх орон, эр цэргүүдийнхээ үйл хэргээр бахархан омогшиж, тэднийхээ цэгцэрсэн жагсаалын сүр жавхланд хийморио сэргээхээр ард иргэд Их эзнийхээ талбайд хуран чуулж, “Монгол цэргийн жаваа”-д саатсан хэн бүхэнд зориулан зэхсэн суудлыг дүүргэсэн байлаа.
Басхүү Нийслэлийн болон БХЯ, ЗХЖШ-ын удирдлагууд, “Монгол цэргийн жавхаа” уралдааны шүүгчид хүндэтгэлийн индэрт уригдаж, Нийслэлийн Засаг дарга бөгөөд Улаанбаатар хотын захирагч Э.Бат-Үүл, Батлан хамгаалахын сайд Д.Бат-Эрдэнэ нар үг хэлж, Төрийн дуулал эгшиглэснээр арга хэмжээ эхэлсэн юм.
Үндсэндээ жагсаалын энэ үзүүлэх тоглолтоос хамаарч “Монгол цэргийн жавхаа” уралдааны шилдгүүд тодрох учраас шалгарсан 9 ангийн бие бүрэлдэхүүн бэлтгэсэн үзүүлбэрээ ээлж дараалан толилуулж, ард иргэдийн бахархал, “манай цэргийнхэн” гэх тэдний омогшлыг бадраасаар байлаа. Энэ бүхний эцэст Зэвсэгт хүчний 120 дугаар анги тэргүүлж, Хилийн цэргийн 0151 дүгээр анги удаалан Зэвсэгт хүчний 353, Хилийн 0164 дүгээр ангиуд 3, 4 дүгээр байрт шалгарав.
Нийслэлийн Засаг даргын шийдвэрээр “Монгол цэргийн жавхаа” уралдааны тэргүүн, дэд, гутгаар байрт шалгарсан шилдэг тохижилттой, жагсаалч ангийг удирдан зохион байгуулсан захирагч, даргыг орон сууцаар шагнаж, тус ангиудад үлээвэр хөгжмийн зэмсгийн иж, мөнгөн шагналыг олгосон бол тусгай байрт нэг ангийг шалгаруулж үлээвэр хөгжмийн зэмсгийн иж, 4 сая төгрөгөөр урамшууллаа.
Дашрамд дурдахад, энэ жилийн хувьд цэргийн анги, байгууллагыг жагсаалын үзүүлбэрээс гадна тухайн ангийн тохижилт, албан хаагчдын эрүүл, аюулгүй орчинд алба хаах нөхцлийг бүрдүүлсэн эсэхийг гол шалгуур үзүүлэлт болгосон. Уралдааны шалгуурын дагуу Улаанбаатар хүрээний цэргийн анги, байгууллагууд ангийнхаа гадна, доторх тохижилт, ногоон байгууламжад онцгой анхаарч, өнгөрсөн жилээс илүү дэвшилттэй ажилласан гэдгийг шалгаруулалтын ажлын хэсэг онцолж байв. Тухайлбал, ангийн ногоон байгууламжийг сэргээж, мод бүрийг паспортжуулан эзэнтэй болгож, алба хаагчид амралт, чөлөөт цагаа зөв боловсон өнгөрүүлэх өрөө, танхимыг тав тухтай байхаар тохижуулан, анги бүр хяналтын нэгдсэн камерын системийг суурилуулсан гээд эрүүл, аюулгүй орчинг бүрдүүлэх чиглэлээр олон ажлыг хийж гүйцэтгэсэн агаад уралдааны хүрээнд нийт анги, байгууллагууд 700 шахам сая төгрөгийн тохижилтын ажил хийсэн гэдгийг “Монгол цэргийн жавхаа” уралдааны зохион байгуулагчид онцолж байв.
Ийнхүү уламжлал болон хэвшсэн дээрх уралдааны төгсгөлд 2013 оны I ээлжээр хугацаат цэргийн алба хаасан дайчдыг халах ажиллагааг хамтатган зохион байгуулж, халагдсан дайчдыг ажлын байранд зуучлах, мэргэжил олгох сургалтад бүртгэх ажлыг дүүргүүдийн Хөдөлмөрийн хэлтэс, ажил олгогч байгууллагуудтай хамтран зохион байгуулсан бол энэ үдэш Нийслэлийн иргэд болон халагдсан дайчдад зориулсан нийтийн үдшийн цэнгүүнийг Их эзэн Чингис хааны талбайд зохион байгуулж, ЗХЖШ-ын ҮЖҮНХ, ЦДБЭЧ, БХИС-ийн Хөгжмийн сургуулийн уран бүтээлчдийн тоглолтоор чимэг нэмэн, ёслолын буудлага хийж, нэг өдрийг Зэвсэгт хүчний сүр жавхлангаар “амьсгалж” үдлээ.