Үндэсний сэтгүүл зүй үүсч хөгжсөний түүхт 100 жилийн ойн хүрээнд 2013 оны Монголын сэтгүүл зүйн салбарын шилдгүүдийг шалгаруулах ёслол саяхан боллоо. Монголын сэтгүүлчдийн эвлэлээс зохион байгуулсан энэхүү үндэсний хэмжээний шалгаруулалтаар Монгол улсын Батлан хамгаалах, Зэвсэгт хүчний төв хэвлэл “Соёмбо” сонин “Салбаруудын шилдэг хэвлэл”-ээр шалгарч, батламж, цомоор шагнууллаа. Мөн тус сонины ахлах сурвалжлагч, дэд хурандаа Г.Баатарнум “Ухаант буурал генералын уулс, усыг баясгасан өдрүүд” нийтлэлээрээ энэ оны “Сонины шилдэг сэтгүүлч”-ээр шалгарсан давхар баяр тохиолоо. Мөн гэрэл зургийн сурвалжлагч, дэд ахлагч А.Алтанхуяг “Алдар” спорт хорооноос “Спортод ээлтэй сурвалжлагч” шагнал хүртжээ.
Ирэх оны хоёрдугаар сард түүхт 90 жил нь тохиох “Соёмбо” сонины хамт олон ийнхүү хоёр дахь удаагаа “Салбарын шилдэг хэвлэл”-ээр шалгарч байгаа бөгөөд түүхэн ойдоо ажлын өрнүүн амжилтаар бэлэг барилаа. Мөн тус сониныхон өдөр тутмын нөр их ажлынхаа зэрэгцээ сүүлийн үед цэргийн сэтгүүлчид, “Соёмбо” сониныхоо түүхэн замналын талаар түүхийн ном бичих, гэрэл зургийн цомог хэвлүүлэх, ахмадуудаа хүлээн авах, сургалт сурталчилгааны ажил, засвар тохижилт хийх зэргээр өчүүхэн ч завгүй байна.