Хөдөлмөрийн
сайд Я.Санжмятав Төв аймаг дахь “Зуун мод МСҮТ”-ийн хичээлийн шинэ жилийн
нээлтэнд оролцож, багш, оюутнуудад сурлагын амжилт хүслээ. Уул уурхай, барилга,
зам тээвэр, аж үйлдвэр зэрэг эдийн засгийн тэргүүлэх салбаруудад мэргэжилтэй
ажилтны хэрэгцээ өдрөөс өдөрт өсөн нэмэгдэж байна. Энэ хэрэгцээ шаардлагыг
хангахын тулд Хөдөлмөрийн яам байгуулагдсан даруйдаа мэргэжилтэй ажилтан
бэлтгэх ажлыг улсын хэмжээнд үйл ажиллагаа явуулж байгаа 80 гаруй МСҮТ-ээрээ
дамжуулан эрчимтэй хийж эхэлсэн. Тэдгээрийн
дөрөв нь Төв аймагт үйл ажиллагаагаа явуулж байна.
Байгуулагдаад 30 гаруй жилийг үдэж, 10 мянга гаруй мэргэжилтэй ажилтан бэлтгэсэн Зуунмод хотын Мэргэжил сургалт үйлдвэрлэлийн төв нь 50 гаруй багш, ажилтантай, 2013-2014 оны хичээлийн шинэ жилд 800 гаруй элсэгч хүлээн авч, барилга, сантехник, нийтийн хоол зэрэг мэргэжлээр сургах зорилт тавьсан байна. Хэдийгээр барилга, үйлчилгээний чиглэлээр сургалт явуулдаг ч энэ жилийн хувьд эрэлт хэрэгцээгээ дагаад барилгын бетон арматур, сантехник, цахилгаан гагнуурчин гэсэн мэргэжлээр элсэлт авсан байна. Элссэн суралцагч 2 жил суралцаад төгсдөг, олонхи нь шууд ажлын байртай болдог гэж тус Мэргэжлийн сургалт үйлдвэрлэлийн төвийн захирал н.Алтангэрэл хэлсэн юм.
Харин салбарын сайд Я.Санжмятав суралцагчдад хандан хэлсэн үгэндээ “Залуус их, дээд сургуулийг шүтэх нь харьцангуй багасч, богино хугацаанд мэргэжилтэй ажилтан болж, өөрийгөө болон гэр бүлээ тэжээх, улсынхаа хөгжил цэцэглэлтэд хувь нэмрээ оруулах хүсэл эрмэлзэлтэй болж байна. Өнгөрсөн хавар 23 мянган хүүхэд Мэргэжлийн сургалт үйлдвэрлэлийн төвийг төгсгөснөөс 80 орчим хувь нь ажлын байртай болсон. Их, дээд сургууль төгссөн залуусаас 30 гаруй хувь нь ажлын байраар хангагдаж үлдсэн нь хаана юу хийх вэ гээд ажил хайж явна. Бас зарим нь мэргэжлээ буруу сонгож гээд мэргэжлийн сургалт үйлдвэрлэлийн төв, коллежид оръё гээд явж байгаа. Харин та бүхэн их зөв сонголт хийсэн байна. Эцэг, эхдээ хамгийн түрүүнд тус болох хүн нь та бүхэн байх болов уу.
Өнөөдөр мэргэжилтэй ажилтны үнэлэмж дээшилж байна. Мэргэжлийн сургалт үйлдвэрлэлийн төвд суралцаж, үйлдвэрлэл дээр гарч ажиллаад төгссөн өдрөөсөө сурсан мэдсэнээрээ 1 сая төгрөгийн цалин аваад, баялаг бүтээх боломж та нарт бий. Шинэчлэлийн Засгийн газар их бүтээн байгуулалтын ажлаа эхэлж зам тээвэр, барилга байгуулалт, үйлдвэрлэл үйлчилгээ, хөдөө аж ахуйн үйлдвэрлэл дээр онцгой анхаарал хандуулан ажиллаж байна. Тухайлбал, хөдөө аж ахуйн үйлдвэрлэл дээр ажиллаж Монгол Улсыг тэжээж байсан малчид бүтээгдэхүүнээ малынхаа арьс шир, ноос, ноолуурыг хямдаар ченжүүдэд өгчихдөг байсан бол одоо үндэсний үйлдвэртээ тушаагаад түүгээр нь монгол хүн эцсийн бүтээгдэхүүн хийж хэрэглэж эхэлж байна. Дунд сургуулийн сурагчдын дүрэмт хувцасны даавууг энэ жил БНСУ-д үйлдвэрлүүлсэн ч ирэх жил монголчууд өөрсдөө хийнэ. Гэсэн ч өнөөдөр дунд сургуулийн сурагчдын дүрэмт хувцаснаас монгол чанар, монгол малчны ухаан, монгол хүний сэтгэл үнэртэж байгаа. Ирээдүйд энэ бүх ажлыг гардаж хийх үндэсний мэргэжилтэй ажилтнууд өнөөдөр энд байгаа та бүхэн шүү. Шинэчлэлийн Засгийн газар үндэсний мэргэжилтэй ажилтандаа 2014 оноос 70 мянган төгрөгийн тэтгэлэг олгохыг зорьж байна. Их, дээд сургуульд суралцаж байгаа оюутнуудад төрөөс 70 мянган төгрөг олгож байгаа бол үнэ цэнэтэй мэргэжил эзэмших оюутнууддаа мөн 70 мянган төгрөг хүргэхийг зорьж байна. Зуунмод хотын Мэргэжлийн сургалт үйлдвэрлэлийн төв хөрөнгө оруулалтын хувьд сайн биш байна, өнөөдрөөс эхлээд оныг дуустал чадах ядахаараа хөрөнгө оруулалт хийхийн төлөө зүтгэнэ. Мөн багш нарыг чадавхижуулах чиглэлээр сургалтыг сургууль дээр нь зохион байгуулна, бусдад туршлага болохуйц сургуулийн үйл ажиллагаатай танилцуулна. Тэр хэрээр та бүхэн ардын хүүхдийг сайн сургаж, чадварлаг мэргэжилтэй ажилтан болгохын төлөө ажиллах ёстой. Бид ч та бүхнийг шахаж ажиллана” гэсэн юм.
Зуунмод хотын Мэргэжлийн сургалт үйлдвэрлэлийн төвийг Хөдөлмөрийн яамнаас зохион байгуулж байгаа “Үндэсний мэргэжилтэй ажилтан бэлтгэх хөтөлбөр”-ийн хүрээнд өнгөрсөн 7-р сард 65 суралцагч суралцаж төгссөн бол энэ сард 2 дахь ээлжийн 20 суралцагч мөн л дээрх мэргэжлүүдээр төгсөж ажлын байранд гарах гэж байна.
Мэргэжлийн боловсролын нэг онцлог нь дадлагыг түлхүү олгодог явдал юм. Тиймдээ ч дадлагын байр суралцагчдын багаж хэрэгсэл стандартад нийцсэн байх тэр шаардлагын дагуу эднийх 1 тэрбум гаруй төгрөгийн шинэ хөрөнгө оруулалтыг татаж, өдөрт нэг танхимд 2 ээлжээр 40 хүүхэд зэрэг дадлагжих хүчин чадал бүхий шинэ дадлагын байртай болжээ. Мөн өнгөрсөн хичээлийн жил тус сургуулийн хувьд багш нарынхаа боловсролд нэлээдгүй анхаарсан жил байсан гэнэ.
Зуун мод МСҮТ гадны төсөл хөтөлбөрүүдтэй зөвхөн хөрөнгө оруулалтын чиглэлээр хамтран ажиллахаас гадна багшлах боловсон хүчний чадавхийг дээшлүүлэх тал дээр ихэд анхааран ажиллаж байгаагаа сонирхуулж байлаа. Тухайлбал, 6 багшийг Герман, Австрали улсад мэргэжил дээшлүүлэх сургалтанд хамруулсан байна. Сургалтын орчин нөхцлөөс гадна суралцагчдад олгож буй мэргэжлээрээ тэргүүлэгч байх зорилт тавин ажиллаж байгаа эдний хамт олныг зөвхөн аймгийн сумдынхан зориод зогсохгүй Улаанбаатар хот, Дундговь, Архангай аймгийнхан бас зорьдог болсон байна.
Төв аймагт төрийн түшээд олноороо очдог ч хичээлийн шинэ жилийн нээлтэд нь оролцон баяр хүргэж байсан тохиолдол бараг үгүй аж. Харин Хөдөлмөрийн сайд Я.Санжмятав Зуунмод хотын төв талбайд болсон дунд сургуулийн сурагчдын хичээлийн шинэ жилийн нээлт, мөн Мэргэжлийн сургалт үйлдвэрлэлийн төвийн хичээлийн шинэ жилийн нээлтэд тус бүр оролцон хүүхэд, залууст амжилт хүссэн нь төв аймагчуудын хувьд содон үйл явдал болов. Сануулахад, Хөдөлмөрийн сайд тус аймаг дахь Хөдөлмөрийн хэлтсийн үйл ажиллагаатай мөн танилцаж, хэчнээн ажлын байр шинээр бий болгов, Жижиг, дунд үйлдвэрлэлийн зээлийн хүрээнд мөн хэдий хэмжээний ажлын байр шинээр бий болов, үйлдвэрлэлүүд өргөжсөн үү зэрэг олон шалгалтыг мөн давхар амжуулсан юм.