ШӨХТГ-ын дарга Б.Бат-Эрдэнэ Олон улсын Улаанбаатарын их сургуулийн багш нарын төлөөлөлтэй уулзлаа. Учир нь төрийн өмчит Улаанбаатарын их сургуулийн багш, удирдлагын төлөөлөл Улаанбаатарын гэх нэршилтэй гурван ч сургууль Монгол улсын хэмжээнд элсэлт авч, сургалтын үйл ажиллагаа явуулж байгаа нь элсэгчдийн дунд төдийгүй гадаад, дотоодын хамтран ажилладаг байгууллага, оюутан, эцэг эхчүүдийн дунд төөрөгдөл үүсгэж байна. Иймээс нийгэмд их хэмжээний андуурал, төөрөгдөл үүсгэж байгаа нэрний асуудлыг шийдвэрлэж өгөхийг ШӨХТГ-аас хүсч, өргөдөл гаргасан юм. Энэ дагуу өнөөдөр ШӨХТГ-ын дарга Б.Бат-Эрдэнэ Олон улсын Улаанбаатарын их сургуулийн багш нарын төлөөлөлтэй уулзаж, мэдээлэл солилцлоо. Ингээд Олон улсын Улаанбаатарын их сургуулийн нэртэй холбоотой баримт бичгүүдтэй нэг бүрчлэн танилцахаар боллоо. Давхардсан нэрний асуудлыг ШӨХТГ хуулийн чиг үүргээрээ шууд шийдвэрлэх боломжгүй.
Харин “Олон улсын Улаанбаатарын их сургууль” гэх нэр төрийн өмчит Улаанбатарын их сургуулийн оюутан, эцэг эхчүүдийн дунд үнэхээр төөрөгдөл үүсгэж, элсэлтэд нөлөөлж байгаа эсэхийг шалгаж, өрсөлдөөний болоод хэрэглэгчийн эрхийг хамгаалах тухай хуулийн хүрээнд асуудлыг нягтлах шаардлага үүсч байна. Мөн энэ асуудлаар зарим мэдээллийг тодруулахаар ШӨХТГ-аас БШУЯ болон Оюуны өмчийн газар, УБЕГ-т хандаад байна.
Нэмэлт мэдээлэл болгон хүргэхэд Олон улсын Улаанбаатарын их сургууль 1995 онд Улаанбаатар коллеж нэртэй анх байгуулагдаж, 2012 онд дээд сургууль болсон бол 2015 оноос Олон улсын Улаанбаатарын их сургууль болжээ. Нийт хоёр мянга орчим оюутантай, 100 гаруй эрдэмтэн багштай. Нийт багш нарын 60 орчим хувь нь эрдмийн зэрэг цолтой. Энэ жил 600 орчим оюутан нэгдүгээр курсэд элссэн талаар тус сургуулийн сургалтын албаны дарга, доктор, дэд профессор Б.Оюун-Эрдэнэ уулзалтын үеэр онцоллоо.