2019 оны 10 дугаар сарын 11-ний өдөр Шударга өрсөлдөөн, хэрэглэгчийн төлөө газрын 2019 оны 4-р Хуралдаан болж дараах 3 асуудлыг хэлэлцэн шийдвэрлэсэн байна. Үүнд:
1. Төмөр замын Эрдэнэт өртөөний “25-р замын 43 дугаар сум”-аас салбарласан дагнасан хэрэглээний салбар зам эзэмшигчийн зах зээлд “Хялганат” ХХК-ийг зүй ёсны монополь аж ахуй эрхлэгчээр тогтоох эсэх судалгаа,
2. “Улаанбаатар төмөр зам” ХНН-ийн ирүүлсэн зарим бүлгийн ачаа тээврийн үнэ, тарифыг өөрчлөх хүсэлтийг хянан зөвшөөрөл олгох эсэх асуудал,
3. “Говь” ХК болон “Гоёо ноолуур” ХХК-ийг нэгдэхийг зөвшөөрөх эсэх дүгнэлтийг хэлэлцэн шийдвэрлэх асуудал.
Хуралдааны явцад Захиргааны ерөнхий хуульд заасан журмын хүрээнд сонсох ажиллагаа явуулж, хэлэлцсэн асуудал тус бүрт эрх, ашиг сонирхол нь хөндөгдөж буй аж ахуйн нэгж, байгууллагын төлөөллийг оролцуулан тайлбар, саналыг нь сонссон байна. Тухайлбал, “Улаанбаатар төмөр зам” ХНН, “Хялганат” ХХК, “Говь” ХК-ийн холбогдох албаны төлөөлөл оролцлоо.
Хэлэлцэгдсэн асуудлыг Хуралдааны дарга, гишүүд дэмжиж нийт 3 тогтоол гаргахаар шийдвэрлэсэн байна.
Ингэснээр Төмөр замын Эрдэнэт өртөөний “25-р замын 43 дугаар сум”-аас салбарласан дагнасан хэрэглээний салбар зам эзэмшигчийн зах зээлд “Хялганат” ХХК-ийг зүй ёсны монополь аж ахуй эрхлэгчээр тогтоож, цаашид үнэ, тарифаа хянуулахыг тус компанийн удирдлагуудад үүрэг болголоо.
Мөн “Улаанбаатар төмөр зам” ХНН-ийн ирүүлсэн зарим бүлгийн ачаа тээврийн үнэ, тарифыг өөрчлөх хүсэлтийг хянаж, химийн ачаа, төмрийн хүдэр, жоншны бүлгийн ачаа тээврийн үнэ, тарифыг 1.03 хувиар 2020 оны 1 дүгээр сарын 1-ний өдрөөс индексжүүлэн өөрчлөх зөвшөөрлийг олгохоор, түүнчлэн “Говь” ХК болон “Гоёо ноолуур” ХХК-ийг нэгдэх хүсэлтийг хэлэлцээд татгалзах дүгнэлтийг хүргүүлэхээр тус тус шийдвэрлэсэн.