Ерөнхий сайд Ч.Сайханбилэгийн "Шийдлийн" Засгийн газрын бүрэлдэхүүнд ажиллахаар Улсын Их Хурлаас Монгол Улсын Батлан хамгаалахын сайдаар томилогдсон Улсын Их Хурлын гишүүн Цэрэндашийн Цолмон өнөөдөр Батлан хамгаалах яамнаа хүрэлцэн ирж, тамгаа гардан, үүрэгт ажлаа хүлээж авлаа. Сайдын ажил хүлээлцэхэд Монгол Улсын ерөнхий сайд Ч.Сайханбилэг, Улсын их хурлын гишүүн, Батлан хамгаалахын сайд асан Д.Бат-Эрдэнэ болон албаны бусад хүмүүс байлцсан юм.
Монгол Улсын Ерөнхий сайд Ч.Сайханбилэг “Шинэчлэлийн” Засгийн газрын бүрэлдэхүүнд хамтран ажилласан Д.Бат-Эрдэнэ сайд хариуцлагатай, өмнөө тавьсан зорилгоо биелүүлж, гадаад харилцаагаа улам сайжруулж, энхийг сахиулах үйлст олон амжилтын эзэн болсныг цохон тэмдэглээд, цаашдынх нь ажил үйлст амжилт хүслээ.
Мөн тэрбээр, шинээр томилогдож байгаа Ц.Цолмон сайд нь улс төрийн хувьд маш туршлагатай, хаттай, хууль тогтоох дээд байгуулагад удаа дараа сонгогдон, хариуцлагатай алба хашиж байсан туршлагатай, хамт олныг удирдан зохион байгуулах чадвартай, танай хамт олны өмнөө тавьсан зорилтыг биелүүлэхэд манлайлан удирдаж чадах хүн гэдэгт итгэлтэй байгаагаа дурдаад Д.Бат-Эрдэнэ сайдыг дэмжин ажиллаж байсан шигээ түүнтэй гар нийлэн ажиллахыг хамт олонд нь захилаа. Ингээд Батлан хамгаалахын сайд Ц.Цолмонд тамгыг гардуулж, ажлын амжилт хүсэв.
Улсын Их Хурлын гишүүн Д.Бат-Эрдэнэ Ц.Цолмон сайдад хандан “Монгол Улсын аюулгүй байдлыг сахин хамгаалах тэргүүлэгч салбарыг өндөр хэмжээнд удирдаж чадна гэдэгт итгэлтэй байна. Бид “Монгол цэрэг бүтээн байгуулалтад”, “Оюутан цэрэг” зэрэг улс орны маань хөгжил дэвшилд нэн чухал төсөл хөтөлбөрүүдийг хэрэгжүүлж эхлээд байгаа. Мөн манай гадаад харилцаа хоёр хөршдөө төдийгүй даян дэлхийд улам түгж байна. Үүнийг улам тэлж хөгжүүлэхэд яам, салбарууд удирдан ажиллаж, дипломат албанд олон жил зүтгэсэн таны арвин туршлага нэн чухал юм. Тандаа улам их амжилт хүсье” гээд хадаг өргөн барьсан юм.
Ийнхүү шинэ ажил албаа хүлээн авсан Батлан хамгаалахын сайд Ц.Цолмон “Энэхүү хариуцлагатай албанд ерөнхий сайдын санал болгосноор ажиллахаар боллоо. Д.Бат-Эрдэнэ сайдынхаа хийж байсан ажил үйлсийг шинэ санал санаачилгаар баяжуулан, үргэлжлүүлнэ. Монгол Улсын нэр хүнд олон улсын тавцанд улам хөгжин дэвжихийн төлөө хамтдаа зүтгэцгээе гэж хамт олондоо уриалъя” гээд ажилдаа орлоо.
Товч намтар:
Ц.Цолмон 1970 онд Архангай аймгийн Цэцэрлэг хотын 10 жилийн дунд сургууль, 1976 онд Эрхүү хотын Политехникийн дээд сургууль, 1982 онд Намын дээд сургууль, 1987 онд Москвагийн Дипломатын академи тус тус төгссөн. Цахилгааны инженер мэргэжилтэй. Профессор, Онц бөгөөд бүрэн эрхэт элчин цолтой, Эдийн засгийн ухааны доктор.
Тэрбээр 1976-1977 онд Махконсервын комбинатад цахилгааны инженер, 1977-1980 онд Хөнгөн, хүнсний үйлдвэрийн яаманд инженер, 1982-1984 онд Монголын Хувьсгалт Залуучуудын Эвлэлийн Төв хороонд хэлтсийн эрхлэгч, 1987-1990 онд Гадаад явдлын яаманд хэлтсийн орлогч даргаар ажиллаж байсан.
1990-1992 онд Хөдөлмөрийн сайдаар томилогдон ажиллаж байгаад, 1992-1994 онд ЮНЕСКО-ийн Үндэсний комисст Ерөнхий нарийн бичгийн дарга, 1995-1996 онд Болгар улсад Онц бөгөөд бүрэн эрхэт Элчин сайд, 1996-2000 онд Оросын Холбооны Улсад Онц бөгөөд бүрэн эрхэт Элчин сайдын албыг тус тус хашиж байв. Дараа нь 2000-2006 онд “Дельтапи” ХХК-ий захирал, 2006-2008 онд Монгол Улсын Засгийн газрын гишүүн, Барилга, хот байгуулалтын сайд, 2008-2012 онд Үндэсний Шинэ Намын даргаар ажиллажээ.
Ц.Цолмон Улсын Их Хурлын 2012 оны зургаа дахь удаагийн сонгуулиар Улсын Их Хурлын гишүүнээр сонгогдож, улмаар Монгол Улсын Их Хурлын Аюулгүй байдал, гадаад бодлогын байнгын хорооны даргаар 2013 он хүртэл ажилласан. 1996 онд
Болгар улсын “Мадарски конник” одон, 2013 онд Хөдөлмөрийн гавьяаны улаан тугийн одон, 2013 онд Хөдөлмөрийн гавъяаны улаан тугийн одонгоор шагнагдсан. Англи, орос хэлтэй.