Зам,
тээвэр, барилгын салбарынхан, гадаад дотоод худалдаа хавартай зэрэгцэн
хөдөлгөөнд орж байна. Бүтээн байгуулалт хийхэд түүхий эд шаардлагатай ч
түүнээс илүү ажлыг гүйцэтгэх боловсон хүчин юм. Шинэчлэлийн Засгийн
газраас ирэх жилүүдэд нийт 150 мянган ажлын байр бий болгох том зорилт
тавьсан ч одоогийн байдлаар ажилгүй хүмүүс ажилд орж, орлогоо
баталгаажуулсан нь олонхийн амьдралд төдийлөн нөлөөлөхгүй байна. Энэ нь
угаас хэдэн сарын хугацаанд зохицуулчих хэрэг биш бөгөөд үүний тулд
Засгийн газраас “Үндэсний мэргэжилтэй ажилтан бэлтгэх хөтөлбөр”-ийг
хэрэгжүүлж байгаа. Тиймээс эхний ээлжинд энэ жилдээ 6600 ажлын байр бий
болгох ажээ. Хүн ажлыг биш, ажил хүнийг голдог учраас мэргэжилтэй ажилтан бэлтгэх гэсэн гол чиглэлээр хөдөлмөрийн салбарыг эхний ээлжинд ийнхүү анхаарах болжээ. Хөтөлбөрийн дагуу эхний ээлжинд 7000 орчим ажил хайгч Хөдөлмөрийн төв биржид бүртгүүлсэнээс нийт 4784 суралцагч танхимын сургалтад сууж, дадлагад гарсан байна. Одоогийн байдлаар хоёрдугаар ээлжинд 2088 суралцагч сургалтаа эхлүүлжээ. Ингээд нэг ажлын байранд ирэх нэг хүнийг таван сарын хугацаанд буюу хоёр сар танхимын-онолын сургалтанд хамруулж, гурван сар компаниудад дадлага хийлгэх байдлаар мэргэшүүлэх аж. Дадлагажуулах нэрийдлээр ажил хийлгэж, хүний хөдөлмөрийг шулах вий гэж айдас эцэг эхчүүдэд бий. Энэ нь зүгээр ч нэг хорооноос сар бүр зохион байгуулдаг мэргэшүүлэх сургалтаас тэс ондоо тухай албаныхан хэлж байна. Тодруулбал, улсын нэгдсэн бодлогоор зохицуулагдаж, дадлагад гарах хугацаандаа суралцагч нь сар бүр 190.400 төгрөгийн тэтгэмж авч, нийгмийн даатгал, эрүүл мэндийн даатгалд хамрагдаж байгаараа онцлогтой гэнэ. Хэрхэн хамрагдах юм бэ гэж үү? Мэргэжилтэй ажилтан болохын тулд Хөдөлмөрийн төв биржид хандсанаар хот, хөдөөгийн нийт 56 Мэргэжлийн сургалт үйлчилгээний төвөөр дамжуулан суралцах юм.
Олноороо уул уурхай гэж шуураад, ирэх жилүүдэд уул уурхайнхан үнэд орох нь уу гэсэн ерөнхий таамаг бидний дунд бий ч ажил олгогчдын юу гэх нь чухал биз ээ. Ажил олгогчдын ирүүлсэн ажлын байрны саналын 68 гаруй хувь нь барилга, техникийн ажил хийж чадах хүнийг эрэлхийлж байна. Монгол Улс нэгэнтээ уул уурхайн салбараа эрчимжүүлбэл ямар амжилтанд хүрч, бүтээн байгуулалт өрнүүлж, эдийн засгаа өсгөж чадах юм бэ гэдгээ мэдэхийн сацуу уул уурхайгаасаа цаашдаа ч хараат байх бололтой гэдгийг ойлгожээ. Тиймээс ирэх жилүүдэд баялгийн хараалаас ангидаар үйлдвэрлэл, түүний өмнөх бүтээн байгуулалтыг төрийн болоод хувийн хэвшлийн ажил олгогчид гардан хийх юм. Тухайлбал, ойрын жилүүдэд Сайншандын аж үйлдвэрийн цогцолбор ашиглалтанд орох, зургаан аймгийг нийслэлтэй холбох авто замын ажил, нийслэлийн зарим байршлуудад нэгдсэн төлөвлөлтөөр орон сууц барих, цаашлаад хот төлөвлөлтийг дахин хийх нүсэр том бүтээн байгуулалт айсуй. Одоогийн байдлаар эрчим хүчний салбарынхан боловсон хүчнийг эрчимтэй “нэхээгүй ч” цаашдаа эрэлттэйд тооцогдох мэргэжлийн нэг гэж буй. Хүн амын эрчим хүчний хэрэглээг хангах том станцууд хөдөө орон нутагт нүүрсний олборлолтыг даган “босох” юм. Тухайлбал, энэ зундаа Төв аймагт салхин цахилгаан станц ашиглалтанд орох бол Тавантолгойд Монголын эрчим хүчний багагүй хэрэгцээг хангаж чадах 450 МгБ-ын хүчин чадалтай дулааны цахилгаан станц барих, нийслэлд Амгалангийн ЦС, үүн дээр нэмэгдээд Тавдугаар ЦС-иудыг барих болж байгаа. Энэ бүрт инженер, техник, барилгын ажилтнууд ус, агаар мэт хэрэгтэй.
Ийнхүү нэг сонгосон ажилд нь мэргэшүүлэх нь хувь хүний сэтгэлгээний хувьд ч ахицтай байж болох. Хэдэн сар сургалтанд сууж байгаа ч тэр хугацаандаа тогтвортой ажил эрхлэхийг биеэр мэдрэх, ажилтны эдлэх нийгэм, эрүүл мэндийн даатгалын ашиг тус өөрсдийн амьдралд ямар хэрэгтэйг ойлгож болох талтай. Одоо цагт ажил хийнэ гэдэг нь хэн нэгэн танилынхаа ажиллуулдаг газарт туслах байдлаар өдрийнхөө хөлсийг өнгөн дүгнэлтээр нь авч нийгмийн тусламж, үйлчилгээний хөнгөлөлтөөс гадуур үлдэх нь олонтаа. Тиймээс тогтвортой ажил эрхэлж, ирээдүйгээ баталгаажуулах нь илүү болоод байна.