Хөдөлмөрийн яамнаас Аймаг, нийслэл, дүүргийн хөдөлмөрийн салбарын ажилтнуудаа чадавхижуулах, нэгдсэн мэдээлэлтэй болгох зорилгоор “Хөдөлмөрийн салбарын ажилтнуудын чадавхи бэхжүүлэх сургалт” –ыг орон даяар зохион байгуулж эхэллээ.Сургалтыг хөдөлмөрийн яамны мэргэжилтэн тухай орон нутагт очиж, зохион байгуулан удирдан явуулах бөгөөд Аймгуудын хөдөлмөрийн хэлтсийн мэргэжилтэнгүүд хамрагдах юм.
Энэ ажлын хүрээнд нийслэл, дүүргийн Хөдөлмөрийн хэлтсийн ажилтнуудад зориулсан сургалт өчигдөр буюу 2013 оны 4-р сарын 15-нд Хөдөлмөрийн төв биржэд эхэллээ. Хөдөлмөрийн салбарын хууль тогтоомж, эрх зүйн актууд, удирдлага, зохион байгуулалт, хөдөлмөр эрхлэлт, харилцаа, ЖДҮ-ийг хөгжүүлэх, Мэргэжлийн боловсролын сургалтын бодлогын хэрэгжилтийг хангах хөтөлбөрийн талаар мэдээлэлтэй болж, чадавхийг дээшлүүлэх зорилготой сургалтанд эхний ээлжинд нийслэлийн Хан-Уул, Чингэлтэй, Баянзүрх дүүргийн Хөдөлмөрийн хэлтсийн 60 орчим мэргэжилтэн хамрагдаж байгаа юм.
Эхний өдрийн сургалтаар ХЭБЗГ-ын Хөдөлмөрийн зах зээл, ажлын байрыг дэмжих хэлтсийн дарга Ц.Амартөгс “Орон нутгийн хөдөлмөр эрхлэлтийн бодлого, төлөвлөлт, хэрэгжилт, үр дүнгийн шалгуур” сэдвээр, ХХБЗГ-ын мэргэжилтэн Д.Мөнхтогтох “Цалин хөлсний бодлого, цалин хөлсний талаарх хууль тогтоомж, тэдгээрийг хэрэгжүүлэхэд анхаарах асуудал”, ЖДҮХГ-ын мэргэжилтэн Б.Мөнхцэцэг “Төрөөс ЖДҮ эрхлэгчдэд үзүүлэх дэмжлэг” сэдвээр мэдээлэл хийлээ.
Сургалт хоёр хоног үргэлжилсэний дараагаар үлдсэн дүүргүүдийн хэмжээнд зохион байгуулагдана. Харин хөдөө орон нутагт Хөдөлмөрийн яамны мэргэжилтнүүд сургалтаа зохион байгуулж эхлээд байна.