Багануур дүүргийн Засаг даргын 2013 оны 12 дугаар сарын 10-ны өдрийн А/470 дугаар захирамжаар “Амьдралын дасгалжуулагч” хөтөлбөрийг хэрэгжүүлж эхэлсэн. Дүүргийн төдийгүй Монгол Улсын хэмжээнд тулгамдсан асуудал болоод байгаа архидалтыг бууруулах, архинд донтсон иргэдийг архинаас гаргах, нийгмийн үйлчилгээг хүргэх, гэр бүлийн хүчирхийлэл дарамтыг бууруулах зорилгоор хэрэгжүүлж эхэлсэн энэхүү хөтөлбөр үр өгөөжөө өгч 14 иргэн архинаас бүрэн татгалзаж хөдөлмөрт бэлтгэх хөтөлбөрт хамрагдаад байна. Засаг даргын санаачлагаар ЗДТГ, ЭМН, Цагдаагийн хэлтсээс хамтран хэрэгжүүлсэн хөтөбөр хэрэгжиж эхлэх үед нийт 22 иргэн хамрагдаж байсан бол эдгээр 14 иргэн тууштай байж, өмнөө тавьсан зорилгоо биелүүлэн архины хамаарлаас бүрэн гарсан бөгөөд эдгээр иргэдийг ажлын байраар хангах, цаашид түүнтэй хамтран ажиллах байгууллагуудад батламжийг гардууллаа. Үүнд:
1. М.Отгонбаяр захиралтай “Багануур” ХК
- Н.Эрдэнэхуяг захиралтай “Багануур сувилал” ХХК
- Ш.Ижилбаяр даргатай Хөдөлмөрийн хэлтэс
- Ц.Отгонжаргал даргатай Нийгмийн халамж үйлчилгээний хэлтэс
- Д.Нямсүрэн даргатай ЦДҮС зүүн бүсийн салбар
- Д.Батнасан даргатай “Автожим” НӨҮГ
- Ш.Доржрагчаа даргатай БЗӨБЦТС ТӨХК
- Б.Жаргалсайхан даргатай “Багануур Дулааны станц” ТӨХК
- Н.Мөнгөншагай даргатай БЗӨБЦТС Багануур салбар
- Д.Төмөр-Очир даргатай “Багануур АЗЗА” ТӨХК
- Ш.Ганцэцэг захиралтай Соёлын ордон
- Г.Намшир даргатай Эрүүл мэндийн нэгдэл
- М.Туулсайхан захиралтай “Боловсрол” цогцолбор сургууль
- Н.Баясгалан захиралтай “Хөх дөрвөлжин” ХХК-иуд багтаж байна.
Эдгээр байгууллагын дарга удирдлагууд “Амьдралын дасгалжуулагч” хөтөлбөрт хамрагдан архинаас бүрэн татгалзсан иргэдийн уулзалт өнөөдөр болсон бөгөөд хөтөбөрт хамрагдагсад “Ажлын байртай болж амьдралд минь гэрэл гэгээ дахин ирж байгаад баяртай байна” хэмээн ярьж байна. Эдгээр 14 иргэн өөрсдийн хүсэл эрмэлзлэлээр нэгдэн дүүргийн Засаг даргын дэргэд “Амьдралын дасгалжуулагч” клубыг байгуулан өөрсөдтэйгөө адилхан алдаж эндэн, архины хамааралтай болсон хүмүүст туслахаар боллоо. Багануур дүүргийн хэмжээнд эрхэлсэн тодорхой ажилгүй, архи байнга хэтрүүлэн хэрэглэдэг 170 орчим иргэн байдаг гэсэн судалгаа байдаг. Цаашид эдгээр иргэдийг нийгэмшүүлэх тал дээр ч төр захиргааны байгууллагаас анхааран ажиллахаар төлөвлөж байна. “Амьдралын дасгалжуулагч” хөтөлбөрийн 3 сарын зардал 3.186.100 төгрөгийг Засаг даргын нөөц сангаас гаргасан байна.