Жижиг, дунд үйлдвэрийг хөгжүүлэх сан /ЖДҮХС/ нь “Жижиг дунд үйлдвэрийн тухай хууль”, “Санхүүгийн түрээс/лизинг/-ийн тухай хууль”, “Зээлийн батлан даалтын сангийн тухай хууль”, “Жижиг, дунд үйлдвэрлэл /ЖДҮ/ эрхлэгчдийг дэмжих чиглэлээр төрөөс баримталж буй бодлого”-ын хүрээнд” ЖДҮ эрхлэгчдэд зориулж 5 хүртэлх жилийн хугацаатай, жилийн 7 хувийн хүүтэй зээлийг олгож байна. Үүний хүрээнд ЖДҮ эрхлэгчдэд эхний жилд үндсэн зээлийн төлбөрөөс 100 хувь чөлөөлөгдөж зөвхөн хүүг төлөх, хоёр дахь жилээс үндсэн зээлээ төлж эхлэх хөнгөлөлттэй нөхцөл бүхий зээлийг банкаар дамжуулан олгох боломжтойгоос гадна санхүүгийн түрээс буюу лизингээр үйлдвэрийн тоног төхөөрөмжийг авч ашиглахад дэмжлэг үзүүлэх, мөн барьцаа хөрөнгө дутагдалтай жижиг, дунд үйлдвэрлэл эрхлэгчдэд зориулан зээлийн давхар батлан даалт гаргах зэрэг үйл ажиллагаа явуулж байна.
2013 оны 9 дүгээр сарын 30-ны байдлаар Жижиг дунд үйлдвэрийг хөгжүүлэх сангаас 5,549 аж ахуй нэгж байгууллага, иргэдийн төслийг шалгаруулжнийт 489,5 тэрбум төгрөгийн зээлийн дэмжлэг үзүүлсэн байна. Зээлийн үр дүнд нийтдээ 26,492 үндсэн ажлын байр нэмэгдэж, 17,365 ажлын байр хадгалагдаж үлдсэн байна.
Зээлийн эх үүсвэрүүдийг ангилж үзвэл:
2009 онд улсын төсвөөс 30 тэрбум төгрөг, банкны оролцооноос 8,6 тэрбум төгрөгийг төвлөрүүлж, нийт 38,6 тэрбум төгрөгийн зээл олгосон.
2010 онд улсын төсвөөс 30,4 тэрбум төгрөгийн санхүүжилт авч, мөн өмнөх оны эргэн төлөлт болон банкны оролцооноос 9,7 тэрбум төгрөгийг төвлөрүүлж, нийт 40,1 тэрбум төгрөгийн зээл олгон, зээлийн эргэн төлөлт 100 хувьтай байсан нь энэхүү хөнгөлөлттэй зээлийн эрэлт хэрэгцээ их, үр дүн өндөр байгааг харуулж байна.
Харин 2011 онд Улсын Их хурлын А/30 дугаар тогтоолын дагуу Хөдөө аж ахуйн салбар болон жижиг дунд үйлдвэрийг дэмжих зорилгоор 300 тэрбум төгрөгийн Засгийн газрын бонд гаргаж, уг бондын эх үүсвэрээс 150 тэрбум төгрөгийг Жижиг дунд үйлдвэрийг хөгжүүлэх санд төвлөрүүлж, үүн дээр эргэн төлөлт нэмэгдэн, нийтдээ 175,1 тэрбум төгрөгийн зээл олгосон.
Мөн ЗГ-ын бондын хөрөнгөнөөс ноос ноолуурын салбарыг хөгжүүлэх чиглэлд 150 тэрбум төгрөгийг тухайн үеийн ХХААХҮЯамнаас байгуулсан ажлын хэсгийн шийдвэрээр олгосон байна.
Дээрх бондын хүүг төрөөс хариуцаж 44,5 тэрбум төгрөгийн хүүг төлсөн бөгөөд бондоос олгогдсон зээл нь 2016 онд бүрэн төлөгдөж дуусах төлөвлөгөөтэй байна.
Түүнчлэн 2012 онд зээлийн эргэн төлөлтөөс төвлөрсөн 25,5 тэрбум төгрөгийн хөнгөлөлттэй зээл олгогдсон бол
2013 оны хувьд Хөгжлийн банкнаас 50 тэрбум төгрөгийн санхүүжилт, эргэн төлөлтөөс 28,7 тэрбум төгрөг төвлөрч 2013 оны 9-р сарын 30-ний байдлаар 47,5 тэрбум төгрөгийг бүс нутгийн хэмжээний зээлд /100 сая төгрөгөөс дээш/ олгосон байна.
Мөн Хөдөлмөрийн сайдын 2013 оны А/39 тоот тушаалаар 12,7 тэрбум төгрөгийн санхүүжилтийг Аймаг, дүүргийн хэмжээнд хөдөлмөрийн хэлтсүүдээр дамжуулан иргэдэд олгож байна. Хөгжлийн банкнаас санхүүжүүлсэн дээрх зээл нь 2018 онд бүрэн төлөгдөж дуусах юм.
2010-2011 онд санхүүгийн түрээсийн үйлчилгээнд / тоног төхөөрөмжийн хөнгөлөлт/ 60 ААН, иргэн хамрагдаж 2,6 тэрбум төгрөгний хөнгөлөлт эдэлсэн байна. Санхүүгийн түрээсийн дээд хэмжээ нь 100 сая төгрөг бөгөөд 10 хувийн хүүтэй, 5 жилийн хугацаатай байдаг.
Зээлийн батлан даалтын сан нь банк, санхүүгийн байгууллагаас зээл авахыг хүссэн боловч зээлийн барьцаа хөрөнгө нь хүрэлцэхгүй байгаа жижиг, дунд үйлдвэр эрхлэгчид зээлийн 60 хүртэлх хувьд батлан даалт гаргаж үйл ажиллагаанд нь дэмжлэг үзүүлдэг. Батлан даалтын дээд хэмжээ нь 250 сая төгрөг бөгөөд 5 жилийн хугацаатай, 1-2 хувийн шимтгэлтэй байдаг. Тодбуулбал, 1 жил хүртэл батлан даалт гаргахад 1хувь, 2 жилээс дээш батлан даалт гаргахад 2хувийн шимтгэлтэй.
Одоогоор тус сангаас 23 ААН, 37 иргэнд 19 тэрбум төгрөгний батлан даалтийг гаргасан байна.