Багануур дүүргийн 4 дүгээр хорооны Тогос-Уул хэсэгт нийт 11 гудамжинд 65 айл өрх амьдарч байна. Эдгээр айл өрхүүд энэ хэсэгт суурьшсан цагаасаа эхлэн гэрэл цахилгаан, нийтийн тээврийн хувьд хаягдмал байсан гэж хэлж болно. Тэгвэл эдгээр асуудлуудыг шийдвэрлэх зорилгоор дүүргийн Засаг дарга М.Гончигжав, БЗӨБЦТС ТӨХК-ний Багануур салбарын дарга М.Мөнгөншагай нар 8 дугаар сарын 06-ний өдөр иргэдтэй уулзалт хийсэн. Уулзалтаар айлууд нэг шонгоос олноороо цахилгаанаа авсан, газар доогуур кабельтай учраас хүчдэл унах, цахилгааны гэмтэл гарах байдлыг таслан зогсоох арга хэмжээг авч Засаг даргын нөөц сангаас 50 сая төгрөгийн өртөгтэйгөөр хийхээр болсныг дуулгаж байсан. Тэгвэл өнөөдөр энэхүү яриа ажил хэрэг болж Багануур энерги ХХК Тогос уул хэсгийн цахилгааныг хэвийн болгох, шонгийн мод нэмэх, айл нэг бүрт стандартын дагуу кабель татах ажил эхэллээ.
Хаана хэдэн хүн амьдарч байгаагаас үл хамааран төрийн үйлчилгээг чанартай, хүртээмжтэй авах ёстой гэсэн байр суурьнаас дүүргийн Засаг дарга хандан өөрийн нөөц сангаас 50 сая төгрөгийг гарган Тогос-Уул хэсгийн айл өрхүүдийг найдтартай цахилгаантай болгох ажил ийнхүү эхэлж байна. Тогос-Уул хэсгийнхний хувьд дүүргийн Засаг дарга асуудлыг хүлээн авч хурдан шуурхай шийдвэрлэсэнд талархаж байлаа. Энэхүү ажил 9 дүгээр сарын 25-н гэхэд дуусах гэрээтэй бөгөөд тун удахгүй энэ хэсэгт байгаа айл өрхүүд дэд бүтцийн хувьд ямар нэгэн бэрхшээлгүй болох юм.
Тогос-Уул хэсэгт автобусны буудал байдаггүй гэсэн гомдол мөн иргэдээс байнга ирдэг. Энэ дагуу иргэдээс санал авч нэг автобусны буудал, хоёр зогсоолтой болгоод байна. Дашрамд сонирхуулахад дүүргийн Засаг даргын нөөц санд нийт 180 сая төгрөг байлаг бөгөөд үүний гуравны нэг нь шахам мөнгийг Тогос уул хэсгийг найдвартай цахилгаантай болгоход зарцуулж байна.