“Улаанбаатар”
Төмөр замын дэргэдэх Мэргэжлийн сургалт үйлдвэрлэлийн төвийн багш, оюутнууд
хичээлийн шинэ жилийн анхны хонхоо цохилоо. Тус сургуулийн 2013-2014 оны
хичээлийн жилийн нээлт өчигдөр 09.00 цагт эхэлсэн юм. Нээлтэд Хөдөлмөрийн яамны
Мэргэжлийн боловсрол, сургалтын бодлогын хэрэгжилтийг зохицуулах газрын
мэргэжилтэн Э.Түмэндэмбэрэл, Боловсон хүчин, нийгмийн асуудал хариуцсан замын
орлогч дарга Ч.Мичиддорж, МТЗ-ын Үйлдвэрчний холбооны дэд ерөнхийлөгч Х.Эрдэнэ
болон албаны бусад хүн оролцсон юм. Төмөр замын дэргэдэх МСҮТ нь тээврийн
салбарт тэргүүлэгч, мэргэжлийн ажилчныг бэлтгэх зорилготойгоор 2007 оноос үйл
ажиллагаагаа явуулж эхэлсэн байна. Энэ хугацаанд нийт 2500 гаруй төгсөгч
бэлтгэн гаргажээ. Нийт төгсөгчдийнх нь 95 хувь нь салбартаа амжилттай ажиллаж
байгааг нээлтийн үйл ажиллагаанд оролцсон албаныхан онцолж байсан юм.
МСҮТ-ийн захирал Ш.Баяраа: ЭЛСЭГЧДИЙН ТОО ЖИЛЭЭС ЖИЛД НЭМЭГДЭЖ БАЙГАА
Манай мэргэжил сургалт үйлдвэрлэлийн төв 2005 оноос үйл ажиллагаагаа явуулж эхэлсэн. Энэ хугацаанд төмөр замын салбарт шаардлагатай найман мэргэжлийн дагуу 2500 оюутан бэлтгэн гаргасан. Манай сургууль Улаанбаатар төмөр зам болон энэ салбарт үйл ажиллагаа явуулдаг хувийн хэвшлийн захиалгын дагуу элсэлт авдаг. Энэ жилийн хувьд төмөр замд шаардлагатай найман мэргэжлийн дагуу нийт 390 оюутан элсүүлсэн. Улаанбаатар төмөр замын дэргэдэх МСҮТ нэг жилийн сургалт явуулдагаараа онцлог. Тиймээс сургалтын хөтөлбөр нь онол 20 хувь, дадлага 80 хувь гэсэн зарчмаар явагддаг. Манайд элсэхийг хүсэгчдийн тоо жилээс жилд нэмэгдэж байгаа. Ялангуяа зорчигчийн вагоны үйлчлэгчийн анги маш эрэлттэй байдаг учраас өндөр шалгуур тавьдаг.
О.Цэнгэлсүрэн: ХҮСЭЛ МӨРӨӨДӨЛДӨӨ ХӨТЛӨГДСӨН
Би төмөр замд ажиллахыг багаасаа хүсдэг байсан. Манай ах эгч нар ч бас төмөр замд ажилладаг. Ер нь хүсэл мөрөөдөлдөө хөтлөгдөөд энэхүү сургуульд орсон. Хүсэл мөрөөдлийнхөө анхны алхмаа хийж байгаадаа маш их баяртай байна.
О.Гантулга: ӨӨРИЙГӨӨ ТЭНЦСЭН БАЙХЫГ ХАРААД МАШ ИХ БАЯРЛАСАН
Манай ихэнх найз энэ сургуулийг төгссөн. Одоо бүгд төмөр зам хэмээх айлын гишүүн болсон. Би ч бас тэдний нэг болохыг маш их хүсэж байгаа. Тиймээс энэ сургуульд элсэж орсон. Шалгаруулалтын оноо гарахад өөрийгөө тэнцсэн байхыг хараад маш их баярласан. Цаашдаа хичээж суралцах болно.
Н.Баасандэмбэрэл