Оюутан залуусын зуны амралт хэрхэн өнгөрдөг билээ? Зарим нь нутаг
ус руугаа очиж, амардаг бол зарим нь хотдоо хийх юмгүй гиюүрч, эсвэл хий дэмий
гэгэлзэж өнгөрөөдөг. Тэгвэл оюутан залуусын чөлөөт цагийг үр өгөөжтэй
өнгөрөөхийн тулд Хөдөлмөрийн яам, Монголын залуучуудын холбоо хамтран санамж
бичиг байгуулж, оюутан залууст чиглэсэн “Цагийн ажил”, “Сумын залуус”, “Ажлын
гараа” төслүүдийг хэрэгжүүлж эхэлсэн билээ. Одоогийн байдлаар “Сумын залуус”,
“Ажлын гараа” төслүүд аймаг, орон нутагт амжилттай хэрэгжиж байгаа талаар
Хөдөлмөрийн яамнаас мэдээллэсэн. Нэрнээс нь харахад л сумын гэж тодотгосон
төсөл нь дээхэн үед илгээлтийн эздээр нэрлэгдсэн оюутан залуус хөдөө очиж
ажиллаж байсантай төстэй юм. Сумын залуус төсөлд нийт 310 суманд 1200
залуус хамрагдаж байна. Үүн дотор 21 аймгийн 21 суманд жишиг өвөлжөө
барих ажээ. Өнөөдрийн байдлаар нийт 24 өвөлжөө барихаас зургаан өвөлжөө
ашиглалтанд орсон гэнэ. Үлдсэн нь наймдугаар сарын 20-нд дуусч, ашиглалтанд
орох юм байна. Суманд очиж ажиллаж буй залууст нэг сарын 200 мянган төгрөгийн
урамшуулал өгч байгаа ажээ. Ийнхүү төсөл амжилттай хэрэгжиж буй ч олон сумыг
хамарч буй гэдгээрээ хүндрэл багагүй гарч байгаа гэнэ лээ. Ингэхдээ аймаг, орон
нутаг бүрт өөрийн гэсэн онцлогтой учраас асуудал гардаг тухай албаныхан
тайлбарласан. Жишээ нь, аймаг, орон нутагт нь малын халдварт өвчин гарч хорио
цээр тогтоосны улмаас ажлаа хийж чадахгүй, эсвэл аймгуудын тэмдэглэлт ой тохиож
ажил хойшлогдох асуудал гарч байжээ.