Дүүргийн Засаг даргын 2013.05.02. А/134, А/135 дугаар захирамжаар Нийгмийн Эрүүл Мэндийн Салбар Зөвлөл ажиллуулах, салбар зөвлөлийн ажиллах журам гарсан. Нийгмийн эрүүл мэндийг хөгжүүлэх, түүнд байгууллага хамт олон, иргэдийн оролцоог нэмэгдүүлэх, иргэдэд эрүүл аж төрөх зөв дадал хэвшил сургах, эзэмшүүлэх, халдват бус өвчнөөс урдьчилан сэргийлэх, түүнээс үүдэлтэй эндэглдийг бууруулах, дүүргийн эрүүл аюулгүй байдлын индексийг сайжруулах зорилгоор дүүргийн нийгмийн эрүүл мэндийн зөвлөлийг байгуулсан. Одоогийн байдлаар салбар зөвлөлийг байгуулах, ажиллах журам боловсруулж батлуулсан, “Хамт олон бүх нийтээрээ жингээ хасъя-Таны оролцоо” аяныг 5 дугаар сарын 01-нээс 10 дугаар сарын 01-ний хооронд зарласан, “Таны амжилт-Эрүүл өглөөнөөс эхлэнэ” дүүргийн удирдах ажилтнуудын уулзалтыг зохион байгуулсан гээд багагүй ажлыг хийгээд байна. Мөн энэ жилдээ багтаан эрүүл мэндийг дэмжигч байгууллага, өрх, иргэн шалгаруулах, тэргүүний НЭМСЗ шалгаруулах, шагнаж урамшуулах, сургалтын нэгдсэн баазтай болох, сургалт сурталчилгааг зохион байгуулах, зөвлөлийн хурлаар байгууллага, хороодын салбар зөвлөлийн ажлын тайлан хэлэлцэх зэрэг ажлуудыг хийхээр төлөвлөж байгаа юм байна.
Дүүргийн хэмжээнд үйл ажиллагаагаа явуулж буй байгууллага аж ахуйн нэгжүүдийн хувьд НЭМСЗ байгуулах ажил хийгдэж эхлээд байна. Байгууллага дээр ажиллах салбар зөвлөл нь ажиллагсдын бие бялдрын хөгжил, эрүүл мэндийн байдал, архи тамхины хэрэглээ, зонхилон тохиолдох өвчлөл зэрэгт судалгаа, дүгнэлт хийх, судалгаан дээр үндэслэн ажиллагсдыг хөдөлгөөний хомсдолоос сэргийлэн нийтийн биеийн тамираар хичээллэх боломжийг бүрдүүлэн бие бялдрын хөгжил, эрүүл мэндийн байдлыг сайжруулах, архи тамхины хэрэглээг багасгах, зөв хоололт, эрүүл мэндийн зөв дадал хэвшил олгох талаар тодорхой ажил, сургалт сурталчилгааг хийх, ажлын байрны ариун цэвэр, эрүүл ахуйг сайжруулж, эрүүл ажлын байр бий болгох, архи тамхигүй хамт олон, эрүүл мэндийг дэмжигч байгууллага, хороо болох хөдөлгөөн өрнүүлж ажиллах юм байна.