Хөдөлмөрийн
яамнаас бүтээмжийн талаарх олон нийтийн ойлголтыг нэмэгдүүлэх сарын ажлын
хүрээнд үндэсний хэмжээнд “МАРГААШАА ӨНӨӨДРӨӨС ИЛҮҮ САЙН, САЙХАН БОЛГОЁ” уриан дор нийтлэлийн уралдааныг зарласан билээ.
Нийтлэлийн уралдаанд төв, хөдөө орон нутгаас нийт 19 бүтээл ирүүлснийг нийгмийн түншлэгч гурван талын бүрэлдэхүүнтэй үнэлгээний ажлын хэсэг байгуулагдан дүгнэсэн байна .
Үнэлгээний ажлын хэсэг 2013 оны 7 дугаар сарын 15-ны өдөр хуралдаж, нийлбэр оноогоор нь байр эзлүүлэн, эхний 4 байрыг шалгаруулжээ. Нийтлэлийн уралдаанд шалгарсан хүмүүст Хөдөлмөрийн яамны Төрийн нарийн бичгийн дарга П.Гантулга шагнал гардуулж, цаашдынх нь ажилд амжилт хүссэн юм. Уралдаанд ирсэн бүтээлүүдээс “Бүтээмж-эдийн засгийн хөгжлийн түлхүүр” нийтлэлээр; “ЖСК” ХХК-ийн нягтлан бодогч, эдийн засагч О.Гантулга тэргүүлж, МҮЭХ-ны Хөдөлмөр сонины эрхлэгч Б.Бүрэнжаргал “Чи ОК, би ОК, бүтээмж ОК” нийтлэлээр, bataar.mn вебсайтын эрхлэгч Г.Мөнхнасан “Бүтээлч байвал бүхнийг дийлнэ” нийтлэлээр удаалсан бол Орхон Их сургуулийн багш Б.Мөнгөнхөлөг “Алдар нэрээс илүү бүтээмжтэй ажил, бүтэлтэй амьдралын үнэ цэнэ чухал” нийтлэлээр дөрвөлсөн байна.
Уралдаанд ирүүлсэн бүтээлүүдэд бүтээмжийг дээшлүүлсний үр дүн нь ажилтанд цалин хөлс, түүний гэр бүлд хадгаламж хуримтлал, аж ахуйн нэгж байгууллага ашиг орлого, хөрөнгө оруулалт болон хүрч, цаашлаад улс орны хөгжил дэвшилд үзүүлэх нөлөөлөл, хүртэх үр шимийн талаар нийтлэгчид маань олон өнцгөөс харж бичсэнээрээ онцлог болсон байна.
Тухайлбал, бүтээмжийг хувь хүн, өрх гэр, аж ахуйн нэгж байгууллага дээрээ хэрхэн хэрэгжүүлсэн, цаашид ямар арга хэмжээ авах талаар өөрийн үзэл бодол, санал санаачлагаа илэрхийлж хувийн болон төрийн байгууллагын ажилтан, сэтгүүлч, эдийн засагч, идэвхтэн бичигч, өндөр настан, оюутан залуус, хувиараа хөдөлмөр эрхлэгч гээд нийгмийн бүхий л түвшний хүмүүс оролцсон нь бүтээмжийн мэдлэг ойлголт, ухамсрыг олон нийтэд хүргэх ажлын гараа болсон гэж ажлын хэсэг дүгнэж байна.
Хэдийгээр өнөөдөр бүтээмжтэй хөдөлмөр эрхлэлт, түүний үр өгөөжийн талаар иргэд, аж ахуйн нэгж байгууллага, жижиг дунд үйлдвэр эрхлэгчид маань тодорхой сайн ойлголт мэдээлэлгүй байгаа ч түүний ач холбогдлыг сайн түгээн сурталчилбал манай улс өрсөлдөх чадварын гол үзүүлэлт болох бүтээмжийг хэрэгжүүлэхэд иргэн бүр оролцох итгэл, зүтгэл байгаа гэдэг нь энэ удаагийн уралдаанд ирүүлсэн хүмүүсийн нийтлэлээс тодорхой харагдаж байлаа.