Ойн тухай хууль, Монгол Улсын Ерөнхийлөгчийн “Мод тарих үндэсний өдөр зарлах тухай” 2010 оны 63 дугаар зарлигийг хэрэгжүүлэх зорилгоор 2019 оны намрын бүх нийтээр мод тарих өдрийг аравдугаар сарын 12, 13-нд тэмдэглэн өнгөрүүлэх гэж байна. Үүнтэй холбогдуулан нийтийн эзэмшлийн талбай, амьдардаг орчиндоо мод бут тарьж, тарьсан ногоон байгууламжаа арчлах, цэнэг усалгаа хийх зэргээр орчны бохирдлыг бууруулахад хувь нэмрээ оруулахыг иргэн, аж ахуйн нэгж байгууллагуудад уриалж байна.
Намрын мод тарих өдрийг угтаж “Тарьц, суулгац-2019” үзэсгэлэн худалдааг Байгаль орчин, аялал жуулчлалын яам, Ойн судалгаа хөгжлийн төвөөс Барилгачдын талбайд аравдугаар сарын 18-ныг дуустал зохион байгуулж байна. Үндэсний цэцэрлэгт хүрээлэнд өмнө нь мод тарьсан иргэд, байгууллагууд аравдугаар сарын 12-ны өдрийн Бямба гарагт 11:00 цагаас хүрз, хувинтай очиж, тарьсан моддоо арчлах боломжтой юм. Мөн Нийслэлийн Байгаль орчны газар, Ус сувгийн удирдах газар хамтран Гачуурт дахь ус хангамжийн эх үүсвэрийн хамгаалалтын бүс дэх 100 га талбайн ойжуулалтын ажлыг 11:00 цагаас, Дээндийн амны ойн цэвэрлэгээний ажлыг 13:00 цагаас хэвлэл мэдээллийн байгууллагуудад танилцуулна.
2018 оноос эхлэн нийслэлийн есөн дүүрэгт хортонд идэгдсэн, түймэрт өртсөн, мод тарих боломжтой 1884 га талбайн байршлыг урьдчилан төлөвлөж, өөрсдийн хөрөнгөөр дээрх газруудад мод тарих хүсэлтэй иргэн, аж ахуйн нэгж байгууллагуудтай гэрээ байгуулах замаар таримал ойг улсын санд хүлээн авах шинэ менежментийг хэрэгжүүлж байгаа тул дээрх чиглэлээр хамтран ажиллах сонирхолтой иргэд, байгууллагууд Нийслэлийн Байгаль орчны газрын Ойн хэлтэст хандахыг хүсье.
Энэ өдрүүдэд НБОГ-аас “Нандин найзууд” ТББ-тай хамтран Сүхбаатар дүүргийн 19 дүгээр хороо Их Баян дахь ойн сан бүхий газарт цэвэрлэгээний ажлыг аравдугаар сарын 12-нд, Монголын Уулчдын үндэсний холбоо, Богдхан уулын ДЦГ-ын хамгаалалтын захиргаатай хамтран “Нэг уулчин – нэг уут хог” арга хэмжээг Богдхан ууланд аравдугаар сарын 13-нд зохион байгуулах гэж байна. Арга хэмжээний үеэр уулчид, уулын клубүүд, ууланд алхах сонирхолтой иргэдэд "UIAA" олон улсын уулын холбоо болон "Петцел сан", Монголын уулчдын үндэсний холбооноос "Газрын зураг болон компастай хэрхэн ажиллах" талаар сургалт явуулна.
Сүүлийн үед хүрэн баавгай зэрэг зэрлэг амьтад хот суурин газарт орж ирэх тохиолдлууд нэмэгдэж байгаа тул дээрх арга хэмжээнүүдэд оролцох болон ногоон бүсэд зорчих бол аюулгүй байдлын зөвлөмжийг мөрдөж, тогтоосон зам маршрутаас өөр газраар ганцаараа зорчихгүй байхыг анхааруулж байна.
Мод тарих арга зүйг үзүүлсэн зурагт хуудас, сэрэмжлүүлэг, видео хичээлтэй танилцана уу гэж нийслэлийн Байгаль орчныг газраас мэдээллээ.