ЗАЛУУСЫН ЗАРДЛЫГ ХӨДӨЛМӨРИЙН ЯАМ ХАРИУЦЖЭЭ
Зуны амралтаараа хөдөө орон нутагт очиж цалинтай ажиллах оюутан залуус өчигдөр ажлын үнэмлэх, тугаа гардан авлаа. Хөдөлмөрийн яам, Монголын залуучуудын холбоо /МЗХ/, залуучуудын Хөдөлмөрийн төв биржтэй хамтран зохион байгуулж буй “Ажилтай, орлоготой Монгол залуу” хөтөлбөрийн үр дүнд хөдөө орон нутагт очиж зуны амралтаараа цалинтай ажиллах, орон нутгийнхаа бүтээн байгуулалтад гар бие оролцох оюутан залуусын нэр өчигдөр тодорсон нь энэ.
Уг хөтөлбөрийн албан ёсны нээлт өчигдөр МЗХ-ны төв байрны өмнөх талбайд болсон юм. Хөтөлбөрийн нээлтэд МЗХ-ны Ерөнхийлөгч А.Мөнхбат, Хөдөлмөрийн яамны Хөдөлмөр эрхлэлтийн бодлогын хэрэгжилтийг зохицуулах газрын дарга Д.Хадхүү болон албаны хүмүүс оролцлоо.
ГУРВАН ТӨСӨЛ ДАВХАРХЭРЭГЖИНЭ
Энэ үеэр МЗХ-ны Ерөнхийлөгч А.Мөнхбат “МЗХ нь 92 жилийн түүхтэй 21 аймаг, есөн дүүрэгт салбар зөвлөлтэй, залуучуудын асуудал мэргэжлээрээ нэгдсэн 17 хороотой залуучуудын төв байгууллага байдаг. Бид 2012 оноос үйл ажиллагаагаа шинэ түвшинд гаргаж, залуучуудын дуу хоолойг олон нийт, төр болон бүхий л салбарт хүргэх, эргээд аливаа үйл ажиллагаанд залуучуудыг татан оролцуулах, тэдний нийгмийн идэвхи, оролцоог сэргээхээр “Ажилтай, Орлоготой Монгол залуу” хөтөлбөрийг хэрэгжүүлж эхлээд байна. Энэ хөтөлбөрийн хүрээнд “Цагийн ажил”, “Ажлын гараа”, “Сумын залуус” зэрэг гурван төсөл давхар хэрэгжинэ. Оюутан залуус маань амралтаараа сум руугаа амрахаар явдаг. Тэдний амралтын саруудыг үр бүтээлтэй, нутаг орныхоо залуусыг идэвхижүүлэх сургалт, үйл ажиллагаа зохион байгуулах, хөдөлмөр эрхлэлтийг нэмэгдүүлэх үүрэгтэй дээрх төслүүдийг хэрэгжүүлнэ. “Ажилтай, Орлоготой Монгол залуу” хөтөлбөрийг Хөдөлмөрийн яам санхүүжүүлж байгаа. Хөтөлбөрт нийт 1300 гаруй залуус хамрагдаж, ихэнх нь орон нутагтаа очиж, ажлаа эхлүүлсэн байна” гэлээ.
СУМЫН ЗАЛУУСТ КОМЬЮТЕР, АНГЛИ ХЭЛНИЙ СУРГАЛТ ЯВУУЛНА
Хөдөө орон нутгийг зорих “Ажлын гараа” төсөлд хамрагдсан оюутан залуус сумдад байгаа залуусыг нийгмийн идэвхтэй амьдралд уриалан компьютерын, англи хэл, эрүүл мэндийн сургалтад хамруулах аж. Эдгээр оюутан энэ сарын 10 гэхэд нутагтаа очиж ажлаа эхлүүлсэн байх ёстой гэнэ.
Үнэндээ хөтөлбөрт оролцож буй залуус нэг зүйлд санаа нэгдсэн нь хичээл амарлаа хийх юмгүй зарим зугаа цэнгэлийн араас орж хэрэгт төвөгт орооцолдох нь ихэсдэг байсан үзэгдэл цэгцрэх боломжтой болсон гэж үзэж байгаа аж.
Түүнлчэн “Цагийн ажил” төслийн дагуу цагаар ажил хийж өөрийн орлогоо нэмэгдүүлэх сонирхол бүхий оюутан залуучуудад аж ахуйн нэгж байгууллага, хувь хүмүүсийн захиалгын дагуу ажлын байраар хангах боломжийг бүрдүүлэх юм. Чухам энэ төсөлд хамрагдсан залуус сардаа хамгийн доод тал нь 500 мянган төгрөгийн цалин, урамшуулал авч ажиллах гэнэ. Харин “Ажлын гараа” төслийн хувьд 15 залуу нэг баг болж төмөр зам, авто зам зэрэг салбарт ажиллах аж. Өөрөөр хэлбэл, тус төсөлд их сургуулиудаас таван баг, Мэргэжил сургалт үйлдвэрлэлийн сургуулиас хоёр баг гарч 21 аймагт жишиг өвөлжөө барих учиртай. Эдгээр залуус өглөөний 07:30-18:00 цагийн хооронд төмөр зам, автозам, барилга байгууламж, сумдад өвөлжөө барих, хадлан хадах, ургац хураах зэрэг ажил хийхээр төсөлд тусгасан байна.
Харин “Сумын залуус” төслийг 21 аймгийн 331 сумдад хэрэгжүүлэх бөгөөд залуусыг өөрийн эзэмшсэн бөгөөд сурч буй мэргэжлийнх нь дагуу сумын иргэдэд болон төрийн албан хаагчдад эрүүл мэнд, боловсролын үйлчилгээг үзүүлэх юм. Тодруулбал, англи хэл, математик, мэдээлэл зүй, үйлдвэрлэл бизнесийн удирдлага чиглэлээр суралцдаг дөрвөн оюутан багийн зохион байгуулалтад орж, Монгол Улсын 331 сумдад хувиарлагдан хоёр сарын хугацаанд ажиллаж өөрсдийн сурснаа бусадтайгаа хуваалцана. Эл хөтөлбөрт нийт 1324 залууг ажлын байртай болгох бөгөөд тэд сарын 200 мянган төгрөгийн цалинтай ажиллахыг удирдлагууд онцоллоо. Мөн эдгээр залуус хийсэн ажлаасаа хүн амын орлогын албан татварт төлөх гэнэ.
Улс төрийн тойм Л.Баатархүү