Түүнтэй зэрэгцэн хүмүүний амьдрал хойшоо биш, урагшаа ахисаар...
“Бидний амьдрал нэг үеэ бодвол дээшилж байнаа.“Мөнгөтэй л бол бүх юм байна” гэж хэн хүнгүй л ярьцгаадаг болсон. Нээрээ л мөнгө байвал ногоон хурганы арьс, нохойн битүү туурайг ч авч болохоор болчхож.
Харин тэр мөнгийг хаанаас, яаж, ямар аргаар олцгоох вэ?
“Ажил хийвэл, ам тостоно” гэдэгдээ. Ардын зүйр үгс юм бодогдуулах үес их байдаг. Ажил л хийх хэрэгтэй. Үүнийг бүгд мэддэг хэрнээ өөрийгөө төгс төгөлдөр болохыг хүлээн, гар хумхин, хоосон мөрөөдөн зүгээр суух залуус олон.
Харин Ариунтуяа бүсгүй бол тэдний нэг биш. Тэр“Хөдөлмөр бол баяр баясгалан, хорвоо дээрх сайн сайхан бүхний эх булаг”гэдэгт итгэдэг нэгэн.
Тэр “ Хүсэл мөрөөдөл, агуу зорилго минь ямар ч үйлдэл хийхгүй байх зуур цаг хугацаатай хамт салхинд хийсчих вий гэдгээс айдаг” хэмээн ярьсан юм.
Я.Ариунтуяа газар зүйн багш мэргэжилтэй. Сургуулиа төгсөөд буман шавиараа хүрээлүүлсэн сайн багш болно гэж мөрөөдөж явсан үе түүнд бий. Олон сургуулийн хаалга татан, ажил ололгүй, хоосон буцах үе гарч л байсан. Яах гэж энэ мэргэжлийг эзэмшив дээ гэж харамсан халаглах үе ч байсан.
Энэ бүхэн Ариунтуяа бүсгүйн ажил хийж, сайхан амьдрах хүсэл мөрөөдлийг мохоогүй юм.
2006 онд Хөдөлмөрийн Биржээс БНСУ-д ажиллах хүч явуулж байгаа тухай сонсоод, ирж бүртгүүлснээр Солонгос улсад 3 жил хөдөлмөрийн гэрээгээр ажиллах боломж олдсон ажээ. Хөдөлмөрийн гэрээгээ дуусгаад, сурсан мэдсэн зүйлээрээ эх орондоо ихийг бүтээх хүсэл тэмүүлэлтэй эргэж ирсэн боловч ажил олдохгүйн бэрхшээлтэй дахиад л тулгарлаа.
Ариунтуяа 2013.06.13-ны өдөр Хөдөлмөрийн төв бирж дээр ирж, ажилгүй иргэнээр бүртгүүлсэн юм. Нээлттэй ажлын байранд газар зүйн багшийн ажлын санал байсангүй тул хүний нөөцийн мэргэжлээр ажилд зуучлуулахаар хүсэлтээ гаргасан байна.
Хэдхэн өдрийн дараа Хөдөлмөрийн төв биржээс Нийслэлийн Урьдчилан Цэвэрлэх Байгууламж ХХК-д хүний нөөцийн ажлын байрны санал ирсэн тухай Ариунтуяад мэдэгдэж, мэргэжлийн чиг баримжаа үзүүлэх сургалтанд хамруулан, зөвлөгөө өгч, түүний давуу талыг ажил олгогч байгууллагад танилцуулан, ярилцлаганд оруулснаар өөрийн хүссэн мэргэжлээрээ ажиллах боломж олдсон юм.
Я.Ариунтуяа “ Манай залуучууд ажил хийх хүсэлтэй боловч яаж хэрхэн ажилтай болох арга замаа, хаана, хэнд хэрхэн хандахаа мэддэггүй учраас гадуур зулгаа эргэтэл ажил хайдаг. Тэдэнд хандан хэлэхэд Монгол улсаас хөдөлмөр эрхлэлтийг дэмжих бодлогын хүрээнд ажилладаг бидэнд мэргэжлийн зөвлөгөө өгч, сургалтанд хамруулан, ажилд зуучилж өгдөг байгууллагууд байдаг юм байна. Тэдэнд хандан ажилтай орлоготой иргэд болж, ажил хөдөлмөрийнхөө үр шимийг хүртэж амьдраарай гэж хэлмээр байна” хэмээн бидэнд ярьсан юм.
Тийм ээ, өөдөлж дээшлэхийн тулд, хүн шиг амьдрахын төлөө ажиллах л хэрэгтэй.
Залуусаа, амьдралынхаа эзэн нь байж аз жаргалыг өөрсдөө бий болгоцгооё!
Я.Ариунтуяа амжилтын түүхээс