Дээхнэ үеийн ТМС(Техник мэргэжлийн сургууль) нэрээ өөрчилж, түүнийгээ дагаад үйл
ажиллагаа нь ч, хамрах хүрээ нь ч өөрчлөгджээ. Ядуу айлын муу сурдаг хүүхэд л
ордог гэсэн ойлголт аль хэдийнэ хуучирчээ. Өдгөө МСҮТ(Мэргэжил сургалт үйлдвэрлэлийн төв) болж нэрээ өөрчилсөн сургуулиуд үнэхээр
номын дуу хадаж, хөдөлмөрийн багаж хангинасан газар болж.
Үйлдвэрлэл урлалын сургууль өнгө сайтай угтав
Ингээд “Ражив Гандийн нэрэмжит Үйлдвэрлэл урлалын политехникийн коллеж” руу жолоо залав. Эндээс ямар нэгэн хачир чимэггүй МСҮТ-ийн дүр зургийг уншигчиддаа хүргэхийг зорьсон юм. Сүхбаатар дүүрэг, Их сургуулийн гудамжнаа орших энэ сургууль ямар ч гэсэн Улаанбаатарт байрлалтай дөрвөн МСҮТ-ийг төлөөлж чадах байх. “Өөдлөх айл үүднээсээ” гэдэг шиг энэ сургууль руу ороход л будаг үнэртсэн шал, хана гээд цэвэр цэмцгэр орчин угтсан нь угаасаа хөдөлмөрийн мэргэжлээр сурдаг оюутнуудтай газар аргагүй. Энэ сургуулийн захирлын албыг МУ-ын гавьяат багш Ж.Юра гэх. Хамт олноо ч, сургуулиа ч өнгөтэй өөдтэй авч яваа хүн. Ж.Юра захирал надад сургуультайгаа танилцуулах хүн гаргаж өгсөн юм.
Анги танхим, сургуулийн коридороор сурагчид, төгсөгчдийн бүтээлүүд өрөөстэй. Эдний сургуульд машины засварчнаас өгсүүлээд уран зураг, урлал дизайны ангиуд байдаг болохоор үүнд ч бас гайхах хэрэггүй. Нэр нь л өөр болохоос СУИС, Хөгжим бүжигт ороод ирчихэв үү гэж андуурам юм. 1960 онд анх үүд хаалгаа нээж байсан энэ сургууль 1990 оноос эхлэн зарим мэргэжлээрээ дээд боловсрол олгох эрхтэй болжээ.Хамгийн их анхаарал татсан нь оюутнуудын бүтээлийн танхимууд байсан юм. Энд ийм танхим хоёр ч байх юм.
Зургийн тайлбар: Үйлдвэр график дизайны ангийн төгсөгч оюутнуудын бүтээл: “Манай сургууль- 2020”
Дүүрэн уран зураг, хөөмөл, дарханы бүтээлүүд, амьд мэт адилхан хийсэн макетууд дүүрэн. Ур ухаан шингээж урласан мөнгөн эдлэлүүд олон байсан нь Монгол дарханы ангийн оюутнуудын ажил гэнэ. Эдгээр хүүхдүүд хэнээс ч ажлын байр горьддоггүй, өөрөө өөртөө ажлын байр бий болгоод явчихдаг, хаана ч гологддоггүй гэнэ лээ.
Ер нь МСҮТ-үүдийн өнгө төрх соц нийгэмд байсантайгаа харьцуулах аргагүй болжээ. Уул уурхай, барилгын салбар, бусад хөдөлмөрийн салбаруудын захиалгыг эдгээр сургуулиуд л дааж гарч байгаа болохоор арга ч үгүй биз.
Степент гэдэг сайхан эд
Төрийн өмчит эдгээр сургуулиуд бүх суралцагчдаа 45 мянгаар цалинжуулдаг нь сайхан. Тэр бүү хэл хэрвээ суралцагч Оюутолгойн захиалгын оюутан бол сард 190 мянган төгрөгийн цалин эдэлдэг гээд бодохоор бушуухан гүйгээд очмоор газар. Бидний зочилсон Үйлдвэрлэл урлалын сургууль хөдөөнөөс ирсэн суралцагч нар байрлах 300 оюутны байртай гээд бодохоор дутуу зүйл ерөөсөө алга. Эднийх жилдээ 1500 гаруй оюутан элсүүлж, хувийн шалтгаанаар л биш бол сургууль завсардах шалтгаан гардаггүй учраас бараг 100 хувь төгсгөдөг гэнэ. Учир нь суралцагсад ажлаа хэр сайн хийж байгаагаас шалтгаалан өөрийн түвшинд таарсан зэрэглэлийн үнэмлэхтэй төгсдөг учраас сургуулиас хөөх, дүнгээс болж хасах явдал огт гардаггүй.
Захиалгын дагуу элсэгчдэд санаа зовох зүйл алга
Өдгөө манай оронд 27 МСҮТ үйл ажиллагаа явуулж буйг сүүлийн жилүүдэд төрөөс сайн дэмжиж байгаа. Үүний нэг жишээ бол “Үндэсний мэргэжилтэй ажилтан бэлтгэх хөтөлбөр”. Энэ хөтөлбөрийн хүрээнд хамрагдсан уул уурхайн цахилгаанчин, барилгын цахилгаанчин, авто машины засварчин, оёдолчин гэсэн мэргэжлийн ангийн суралцагч нар Монгол Улсын том бүтээн байгуулалтанд оролцож буй аж ахуйн нэгж байгуулагууд, бусад үйлдвэр аж ахуйн нэгжүүдэд үйлдвэрлэлийн дадлага хийж эхлээд байна. Тухайлбал, Монголын Алт компаний захиалагатай уул уурхайн цахилгааны ангийн суралцагчид Өмнөговь аймгийн Цагаан Суваргын зэс молибдений 18 жилийн нөөцтэй уурхайн бүтээн байгуулалтын ажилд гар бие оролцон дадлагажиж байна.
Зургийн тайлбар: МАК-ийн захиалгатай уул уурхайн дадлагажигч оюутнууд ирээдүйн ажлын байран дээрээ
Тус коллежийн Барилгын мэргэжлийн суралцагч нар “Орчлон Констракшн”- ий охин компани “ Зэт энд Эй”-д барилгын цахилгаанчнаас өрлөгчин гэх зэрэг ажлууд хийж улс орныхоо хөгжил дэвшилд хувь нэмэр оруулж ажлын дадлага туршлагатай болж байна.
“Говь” ХХК-ий захиалгаар суралцсан суралцагч нар тус компаний дэргэдэх “Говь салон” дээрүйлчлүүлэгчдийн хүссэн хэмжээ, загварын дагуу ноолууран дээл, хувцасыг хийж гүйцэтгэх ажилдаа ороод байгаа зэрэг эдгээр мэргэжлээр суралцагсад сургуульдаа анх орохдоо л захиалгын дагуу ирдэг болохоор ажлын байр олдохгүй гэсэн асуудал алга. на.
Зургийн тайлбар: Говь салонд дадлагажигч нар
Авто машины засварчин мэргэжлийн ангийн суралцагчид “Панда авто клиник” компаний үйлчлүүлэгчдэд засвар үйлчилгээ хийн олж авсан онолын мэдлэгээ практик дээр улам батжуулан ажиллаж байгаа болно. “Арц суварга” ХХК-ний гэрээтэй суралцагчдын хувьд замын ажилд оролцож амьдрал дээр бүхий л зүйлийн мэдлэг чадварыг олж авч байна.
Үйлдвэрлэл урлалын сургуулийн насанд хүрэгчдийн боловсрол хариуцсан менежер, доктор З.Энхжаргал: Насанд хүрэгчдийн мэргэжил дээшлүүлэх сургалт бүх насныханд боломж олгож байгаа
- Бүх МСҮТ ийм сургалт явуулж байна уу?
- Ихэнх МСҮТ-үүд “Насанд хүрэгчдэд зориулсан мэргэжил дээшлүүлэх сургалт”-ын үйл ажиллагаа явуулж эхлээд байгаа нь чухам нийгмийн захиалга гэж хэлж болно. Энэ сургалтанд байгууллагууд ажилтныхаа мэргэжлийг дээшлүүлэхээр сургах нь элбэг. Эсвэл хувь хүн өөрөө ч мэргэжлээ дээшлүүлж, зэрэгтэй үнэмлэх авч болох юм.
- Ямар нэгэн насны хязгаар заагаагүйгээрээ онцлог санагдлаа?
- Тэгэлгүй яахав. Насны хязгааргүйгээрээ онцлог эл сургалт эрэлт ихтэй байх нь ойлгомжтой. Өнөөдөр хэн ч гэсэн сайхан амьдрахыг хүсэж байна шүү дээ. Манай сургалтууд хөгжлийн бэрхшээлтэй иргэдийн, оройн, эрхийн бичгийн, амралтын өдрүүдийн, давтан, гэхчилэн төрөлжсөн байгаа нь давуу тал юм.
Хэрэгцээнд суурилсан боловсрол
Аливаа зүйл хэрэгцээгээ дагадаг гэдгийг МСҮТ харуулж байна. Үнэхээр манай барилгажиж буй, уурхайжиж буй нийгэмд шаардагдах ажиллах хүч гэдэг ойлгомжтой. Тэнд цагаан захтай, дээд боловсролтой нэгэн дутаагүй байна. Харин сайн засварчин, гагнуурчин, том тэрэгний жолооч, оператороор цангаж байгаа нь МСҮТ-ийг үнэд орж, өнгө нэмэхэд хүргэжээ. Хэрэгцээ нь ч, өндөр цалин нь ч эдгээр салбаруудад байгаа болохоор мянгаар тоологдох дээд боловсрол эзэмшүүлдэг их дээд сургуулиуд үнэ цэнэгүй, нэр хүндгүй болсоор. Ялангуяа хувийн дээд сургууль олшроод байгаа үед бакалаврын диплом гэдэг харуулын үүдэнд хадсан зарын бичгээс үнэгүйдэх нь ойлгомжтой.
Өдрийн шуудан
Р.СЭЛЭНГЭСАЙХАН