Дүүргийн хөгжилд иргэдийн оролцоог нэмэгдүүлэх, иргэдийн өмнө тулгамдаж байгаа асуудлуудыг шийдвэрлэх зорилгоор иргэдийн санал хүсэлтийг энэ оны эхнээс олон төрлөөр авдаг болсон. Дүүргийн вэб сайтыг шинэчлэн иргэдийн санал сэтгэгдэл авах боломжтой болгосон, дүүргийн ЗДТГ-ын фейсбүүк болон твиттер хаягийг ашиглан 24 цагийн турш иргэдийн санал хүсэлтийг хүлээн авч байгаа, хүн амын төвлөрөл ихтэй 10 цэгт саналын хайрцгийг байршуулсан гээд иргэдийн саналыг авах, ажил хэрэгтээ тусгах чиглэлд ихээхэн анхаарсан. Энэ хүрээнд гуравдугаар сарын 15-наас эхлэн дүүргийн Засаг даргын санаачлагаар иргэдийн ирүүлсэн санал хүсэлт, өргөдөл гомдол нэг бүрт хариуг захидлаар хүргэж эхлээд байна. Ямар нэгэн байдлаар өргөдөл гомдол гаргалаа ч хэрхэн яаж шийдвэрлэсэн талаар мэдээлэл байдаггүй гэсэн гомдлыг иргэд ихээр гаргадаг. Тэгвэл энэ байдал өөрчлөгдөн таны санал хэрхэн шийдвэрлэгдэж, ямар ажил болсон талаар танд хариу захидал гэрт тань очдог болоод байна. Дүүргийн төр захиргааны байгууллагаас явуулж байгаа үйл ажиллагаа, бодлого шийдвэрийг олон нийтэд нээлттэй ил тод байлгах, хийж хэрэгжүүлж байгаа ажлуцудад иргэдийн байр суурь ямар байгааг сонсох, аливаа ажлыг хийхдээ иргэдийн оролцоонд тулгуурлах бодлогыг дүүргийн Засаг дарга баримталж байгаа. Тийм ч учраас иргэдээс ирүүлсэн санал хүсэлт нэг бүрийг нэг ажил болгох үүднээс таны санал хүсэлтэд бичгээр хариуг хүргүүлж байна. Дашрамд сануулахад 7021-4444 дугаарын утсаар иргэдийн санал хүсэлтийг ажлын цагаар авч байгаа бөгөөд утсаар ирүүлсэн саналын хариуг ч мөн бичгээр танд хүргүүлэхээр болоод байгаа юм. Иргэд та бүхэн санал хүсэлтээ ирүүлэхдээ холбогдох хаяг, утасны дугаараа үлдээгээрэй. Тэгвэл таны хаягаар буцаж холбогдон хариуг хүргүүлэх юм. Дүүргийн Засаг даргын зүгээс иргэдтэй ойр байх, тэдний санаа бодлыг ажилдаа тусгах бүхий л боломжуудыг ашиглах үүднээс дээрх сувгуудаар мэдээллийг хүлээн авч шийдвэрлэхээр ажиллаж байна.