Энэ жил мод тарих сайн үйлсэд ЕБС-ийн 11-р анги төгсөгчид нэгдлээ. 2013-2014 оны хичээлийн жилд Ерөнхий боловсролын сургуулийг 491 сурагч дүүргийн хэмжээнд төгсөж байна. Эдгээр сурагчид төгсөлтийнхөө баярыг энэ сарын 11-ний өдөр тэмдэглэсэн нь үндэсний мод тарих өдөртэй давхацсанаараа онцлог байлаа. Дүүргийн Засаг даргын зүгээс санаачлага гарган төгсөгчийн нэрэмжит төглийг сургуулийн орчинд бий болгон мод тарих ажлыг хийхээр болж үүнийг сургуулийн захиргаа сурагчид талархан дэмжиж “Гүн галуутай” цогцолбор сургууль 70, “Боловсрол” цогцолбор сургууль 80 модыг сургуулийнхаа орчинд тарьлаа. Хүний амьдралын баяр жаргалтай мөчүүдийн нэг болсон мөнгөн хонхны баяр, амьдралын нэгэн үеэ учир утгатай тэмдэглэн өнгөрүүлэх учиртай гэсэн үүднээс мод тарих ажлыг баярын хөтөлбөрт багтаах санаачлага гаргасан гэдгээ дүүргийн Засаг дарга мод тарих үеэрээ сурагчдад хэлж, сурагчид ч амьдралынхаа баяр жаргалтай мөчид мод тарьж байгаадаа сэтгэл хангалуун байгаагаа илэрхийлсэн юм.
Дашрамд сонирхуулахад Багануур дүүрэгт энэ жил 25,000 мод тарихаар төлөвлөж байгаа бөгөөд урьд өмнө нь ийм олон модыг нэг жилд тарьж байсан тохиолдол байхгүй юм байна. Энэ хүрээнд гэр хорооллын айл өрх бүрийн хашаанд мод тарих “Нэг өрх нэг мод” аяныг зохион байгуулж эхлээд байна.