Азийн сангаас Улаанбаатар хотын Захиргаанд нисгэгчгүй агаарын
төхөөрөмжөөр авсан гэр хорооллын газрын зураглалыг хүлээлгэн өгөх ажлын
хүрээнд Хот төлөвлөлт болон нийтийн үйлчилгээний хүртээмжийг сайжруулах
зорилгоор Open Street Map / OSM / газрын зураглалд Улаанбаатар хотын гэр
хорооллын дэд бүтцийг тэмдэглэх “OSM Map-A-Thon” болзолт уралдааныг энэ
сарын 20, 21- ний өдрүүдэд зохион байгууллаа.
Энэхүү уралдаанд
шалгарсан эхний 3 багт нийслэлийн Засаг дарга бөгөөд Улаанбаатар хотын
Захирагч Э.Бат-Үүл шагнал гардуулав. Тэрээр уралдаанд идэвхитэй оролцсон
багуудад талархал дэвшүүлж, Та бүхний хийсэн ажил их чухал гэдгийг
онцлоод уг ажил нь гэр хорооллын газрын зураглалыг илүү нарийвчлан
харуулж, газрыг эдийн засгийн эргэлтэнд оруулахад чухал үүрэг гүйцэтгэх
юм гэдгийг онцлон хэллээ.
Уралдаанд 17 багийн 50 орчим оюутан залуус
идэвхитэй оролцож, 20 мянга гаруй объектуудыг OSM газрын зурагт оруулж,
хөгжүүлэлт хийв. Уралдааныг нисгэгчгүй агаарын төхөөрөмжөөр авсан газрын
зураглалыг OSM дээр суурь зураг болгон ашиглаж, зам, барилга, гол горхи
болон бусад онцлог байгууламжуудыг зураглалд буулгах, засах, олох зэрэг
үйлдлүүдийг танин мэдэхүйн арга замаар явуулсан юм. Багуудын бий
болгосон зураглалыг Улаанбаатар хотын Захиргаа GIS буюу газарзүйн
мэдээллийн системд оруулан дүн шинжилгээ хийж, хотын гэр хорооллын
төлөвлөлт болон нийтийн үйлчилгээг сайжруулахад чиглэсэн үйл ажиллагаа,
бодлого боловсруулах ашиглана. OSM газрын зураглалыг ашигласнаар иргэд
тухайн амьдарч буй бүсэд хийж байгаа дэд бүтцийн ажлууд, шинэ барилга
байгууламж, хатуу хучилттай засмал болон шороон зам, сургууль, цэцэрлэг,
автобусны зогсоолын байршил зэргийг тэмдэглэх боломжтой гэж Нийслэлийн ЗДТГ – ын Хэвлэл мэдээлэл, олон нийттэй харилцах хэлтсээс мэдээллээ.