Боршоо-Хандгайтын боомтыг олон улсын статусаар ажиллуулж эхлүүлэхэд хоёр талаас хийгдэж буй дэд бүтцийн бэлтгэл ажлын асуудлаар мэдээлэл солилцох зорилготой ажил хэргийн уулзалт 06 сарын 27-нд Улаангом хотноо боллоо.
Тува улсын талаас Тува улсын Засгийн газрын Тэргүүний орлогч Анатолий Партизанович Дамба-Хуурак ,Тува улсын гадаад-эдийн засгийн харилцааны агентлагийн захирал Ондар Ч.Ч-Д нар, Монголын талаас Увс аймгийн Засаг дарга Д.Цэндсүрэн, Засаг даргын орлогч Б.Цэцээ, Боомтын нэгдсэн захиргааны хөгжлийн газрын дарга Ц.Батсүх, Боршоо боомтын зөвлөлийн дарга Б.Батболд болон холбогдох хил, гаалийн холбогдох албаны хүмүүс оролцлоо.
Уулзалтын үеэр Увс аймгийн Засаг дарга Д.Цэндсүрэн мэдээлэхдээ:
-“Монгол улсын Засгийн газраас боомтын хөгжилтэй холбоотой томоохон арга хэмжээ авч байгаа бөгөөд Боомтын нэгдсэн захиргаа шинээр байгуулагдаж эхний ээлжинд 8 боомтын захиргааг яаралтай байгуулж, боомт орчим үйл ажиллагаа явуулдаг гааль, мэргэжлийн хяналт, иргэний харъяалал, шилжилт хөдөлгөөний алба зэргийг нэгдсэн удирдлагад шилжүүлэх яаралтай арга хэмжээ авсан бөгөөд үүнд: Увс аймгийн Боршоо боомт, Тэсийн Шар үзүүрийн боомт багтсан.Боомтын нэгдсэн захиргаа нь ЗГХЭГ-ын дарга, УИХ-ын гишүүн Сайханбилэгийн шууд удирдлагад ажиллаж байгаа. МУ-ын Засгийн газар, Ерөнхийлөгчөөс Боршоогийн боомтын асуудлыг нэн яаралтай ОУ-ын боомт болгох, үүнтэй холбоотой хөрөнгө оруулалтын асуудлууд болон Тува улстай холбоотой яриа, хэлэлцээрүүдийг нэн яаралтай ажилд нь оруулах талаар биечлэн үүрэг өгсөн байгаа. Иймээс энэ яриа хэлэлцээрт боомтын нэгдсэн захиргааны хөгжлийн хэлтсийн дарга Ц.Батсүхийг урьж биечлэн оролцуулж байгаа юм.
Монгол улсын Засгийн газраас Боршоогийн
боомтыг хөгжүүлэх бодлого гараад 23,0 орчим тэрбум төгрөгийн хөрөнгө оруулалтыг
Боомтын захиргаа болон боомтын шалган нэвтрүүлэх боомттой холбоотой хөрөнгө
оруулалт хийхээр төлөвлөсөн байгаа.
Энэ хөрөнгийг нэн яаралтай шийдвэрлэж олон улсын боомттой болгох асуудал дээр
шуурхай ажиллаж яаралтай зохион байгуулах талаар МУ-ын Боомтын нэгдсэн
захиргаа, Увс аймгийн ИТХ, ЗДТГ, МУ-ын Засгийн газар, Ерөнхийлөгчийн зүгээс
нэлээд анхааралтай авч үзэж 2015 оноос хэрэгжүүлж эхлэхээр шийдвэрлээд явж
байна. Монгол улсын Засгийн газраас Увс аймгийг Улаанбаатар хоттой, дээр нь
БНХАУ-ын ШУӨЗО-той авто замаар холбох энэ дэд бүтэцтэй холбоотой боомтын
хөгжлийн асуудлаар бүс нутгийн талаар онцгойлон анхаарал тавьж байгаа.Улаангомоос
Улаанбаатар хотын чиглэлд 325км хар зам барьж байгаа, үүний 190км зам
ашиглалтанд орсон, 2015 онд 135км замыг барьж дуусна. Ийнхүү бид Завханы
Сонгино сум хүртэл зам тавьж байгаа, Улаангом-Ховдын чиглэлд 170км замыг 2016
онд барьж дуусна. Танай талаас Кызыл-Хандгайт чиглэлд М-54 зам баригдах юм бол
Увс аймаг нь Ази Европыг холбосон автозамын зангилаа болох боломжтой. Хамгийн
гол нь бид хоёр улсын Засгийн газартаа холбогдох асуудлаа улмажлан цаг хугацаа
хүлээхгүйгээр боомтын дэд бүтцийг сайжруулах ажилдаа орох хэрэгтэй байна” гэдгийг онцлон
тэмдэглэв.
Сүүлийн үед манай 2 улсын хооронд ялангуяа Боршоо, Шар үзүүрийн боомтоор нэвтэрч байгаа иргэдийн тоо нэмэгдсээр байгаа. 2013 онд нийт Монгол зорчигчид 7155, гадаад зорчигчид 18543 зорчиж байгаа нь бага тоо биш, зорчиж буй иргэдийн тоо, экспорт, импортоор орж ирж байгаа бараа бүтээгдэхүүний тоо хэмжээг нэмэгдүүлэх, барааны эргэлтийг сайжруулах нь аль аль талаасаа анхаарч ажиллах шаардлагатай байгааг мөн дурдсан юм.
Тува улсын Засгийн газрын Тэргүүний орлогч Анатолийн Партизанович хэлэхдээ:
-“ОХУ-ын Холбооны зөвлөлийн 6-р сарын 16-ны тогтоолоор Тува улсын нийгэм эдийн засгийн хөгжилд дэмжлэг үзүүлэх нэлээд олон асуудлыг шийдвэрлэх тогтоол гарсан. Уг тогтоолд ОХУ-ын Үндэсний фондоос төмөр зам тавих ажилд 86,0 тэрбум рублийн хөрөнгө оруулалт тусгагдсан байгаа. Бүх ажлын төслүүд хийгдэж дууссан, барилгын ажил энэ онд эхлэхээр шийдвэрлэгдэж байгаа, цашдаа Монгол Улсын Засгийн газар дэмжвэл Монголын нутаг дэвгэрээр дамжуулан БНХАУ-ын Шинжиан Уйгартай холбох бололцоотой бөгөөд энэ төмөр зам тавигдсанаар Ази Номхон далайг холбосон төмөр замын сүлжээнд холбогдоно гэсэн үг. Мөн түүнчлэн Кызыл Хандгайтын чиглэлд Холбооны М-54 зам тавигдахаар урьдчилсан тохиролцоонд хүрээд байгаа бөгөөд энэ ажилд 716,0 сая рублийг төсөвлөсөн байгаа.Цаашдаа Боршоо-Хандгайтын боомтыг олон улсын статусаар ажиллуулахад хил, гааль дээр гардаг хүндрэл бэрхшээлийг арилгах, мөн боомт дээр ажиллаж буй хүмүүс хууль дүрмээ сайн судалж мэдэж ард иргэд, бизнес эрхлэгчдэд туслах шаардлагатай байгаа”-г онцлон тэмдэглэв.
О.Саруул