Нийслэлийн иргэдийн Төлөөлөгчдийн Хурлын ээлжит 19 дүгээр хуралдаанаар нийслэлийн эдийн засаг, нийгмийг 2017 онд хөгжүүлэх үндсэн чиглэлийн биелэлт, 2018 оны хэрэгжилтийн явц болон 2019 оны Улаанбаатар хотын эдийн засаг нийгмийг хөгжүүлэх үндсэн чиглэлийг хэлэлцлээ. Хуралдаан хоёр өдөр үргэлжилж, өнөөдөр Нийслэлийн Засаг дарга бөгөөд Улаанбаатар хотын Захирагч С.Батболдын багт дүнгээ тавьж, ирэх оны үндсэн чиглэлийг баталлаа.
Монгол улсын нийт хүн амын 50 гаруй хувийн ажил, амьдрал Улаанбаатар хоттой салшгүй холбоотой байдаг. Тэр утгаараа хотын удирдлагын хэрэгжүүлж байгаа ажилд алдаа, оноо ч бий гэдгийг НИТХ-ын төлөөлөгчид онцолж байсан. Тухайлбал, УИХ-аар “Нийслэлийн эрх зүйн байдлын тухай хуулийн төсөл”-ийг батлуулахад онцгой анхаарах. Ингэснээр хот өөрийн гэсэн санхүү, эдийн засгийн эх үүсвэртэй байж, хөрөнгө оруулалтаа нэмэгдүүлэн, иргэн болон айл өрхөд чиглэсэн бүтээн байгуулалтыг өрнүүлэх хууль эрх зүйн орчин бүрдэнэ гэдгийг хэлээд, энэ хуулийн төслийг батлуулахын төлөө зөвхөн хотын удирдлагын баг төдийгүй Улаанбаатараас сонгогдсон УИХ-ын гишүүдийг ч шахаж ажиллах хэрэгтэйг хэлж байлаа. Өнгөрсөн хоёр жилийн хугацаанд Нийслэлийн Засаг дарга бөгөөд Улаанбаатар хотын Захирагчийн үйл ажиллагааны мөрийн хөтөлбөр “Хангалттай” гэсэн үнэлгээ тавихуйц хэрэгжсэн. Гэр хорооллыг хөгжүүлэх шинэ бодлого, шинэ стратегийн хүрээнд “Сервис центр буюу Дэд төв” байгуулах төслийг Чингэлтэй дүүргийн 7 дугаар хороонд амжилттай хэрэгжүүлж, 200 өрх айл хашаандаа халуун, хүйтэн устай холбогдож байна. Мөн Сэлбэ, Баянхошуу дэд төвүүдийг Азийн хөгжлийн банктай хамтран хэрэгжүүлсэнээр орон сууцны цогцолбор хороолол байгуулах ажил эрчимтэй өрнөж байгааг сайшаасан.
Боловсролын салбарт тулгамдсан асуудал их байгаа ч гэлээ энэ хоёр жилийн хугацаанд “Цахим бүртгэл” нэвтрүүлж, цэцэрлэг, сургуулийн 100 гаруй обьект барьж байгуулах ажлын газрыг 97 хувь чөлөөлөлт хийж, бүтээн байгуулалтын ажлыг эхлүүлсэнээр 2019-2020 оны хичээлийн жилд Монгол Улсын Засгийн газрын зорилтын хүрээнд сургуулиудыг 2 ээлжинд шилжүүлэх бэлтгэл ажил хийгдэж байгааг дурьдлаа.
Дэд бүтцийн салбарт авто замын томоохон бүтээн байгуулалт өрнөж байна. Ялангуяа сүүлийн 60 жил урсгал засвараас өөр дорвитой ажил хийгдээгүй гүүрэн байгууламжийн бүтээн байгуулалт өрнөж, Яармагийн гүүрийг шинэчлэх, хуучныг сэргээн засварлах төслийн ажил дуусч, авто замын хөдөлгөөнийг өнөөдөр бүрэн нээж байгаа нь Нийслэлийн Засаг дарга бөгөөд Улаанбаатар хотын Захирагч С.Батболдын удирдлагын багийн ажлын үр дүн гэдгийг ч төлөөлөгчид онцолж байсан юм. Энэхүү гүүрийн нээлтэд НИТХ-ын төлөөлөгчид оролцлоо.
Эрүүл мэндийн салбарт “Шүд, эрүү нүүрний эмнэлэг” шинээр ашиглалтад оруулж, дүүргүүдийн эмнэлгийг яаралтай тусламжийн мэс заслын тасагтай болгоод зогсохгүй өрхийн эмнэлгүүдэд шаардлагатай тоног төхөөрөмжөөр хангаж, Сонгинохайрхан дүүрэгт “Жишиг дүүргийн эмнэлэг” барьж байгаа нь хотын даргын үйл ажиллагааны мөрийн хөтөлбөрийн биелэлтийг харуулж байна. Нийслэлийн үйлчилгээний нэгдсэн төвийг нэмэгдүүлж, хороодод төрийн үйлчилгээг шуурхай хүргэхэд анхаарч байгаа нь хот өөрөө хүндээ хүрч ажиллах нөхцөл бий болохыг хэллээ.
Төвлөрөлийг сааруулах, түгжрэлийг бууруулах ажлын хүрээнд “Шинэ Яармаг төв” байгуулах ажил ч хурдацтай хийгдэж байгаа нь хотын даргын ажлыг “Хангалттай” гэж дүгнэхэд хүргэж байгаа юм. Зоригтой, зорилттой шийдлүүд хотын иргэдийн талархлыг хүлээж байгаа ч төлөөлөгчид хэлж байсан юм.
Улаанбаатар хот өргүй болсон. Ингэснээр хөрөнгө оруулалт, бүтээн байгуулалтад зарцуулах хөрөнгийн хэмжээг нэмэгдүүлэх бага ч атугай боломж гарч байгааг НИТХ-ын төлөөлөгчид онцолж байлаа. Монгол улсын эдийн засаг өссөнөөр хотын төсөв ч бэхжиж байна. “Зам чөлөөл”, “Явган хүний зам” аянуудыг цааш үргэлжлүүлж, ногоон байгууламжийг нэмэгдүүлж, эмнэлгүүдийн гадна талбайг тохижуулж, авто зогсоолын тоог өсгөж байгаагаа тасралтгүй үргэлжлүүлэх хэрэгтэйг ч санууллаа.
Иргэдийнхээ амьдрах орчныг сайжруулах, төрийн үйлчилгээний хүртээмжийг нэмэгдүүлэх, явган хүн зам аяныг тууштай үргэлжүүлж, хашаа хайсгүй хот болоход хаа хаанаа зоригтой ажиллах хэрэгтэйг ч төлөөлөгчид дурьдаад нийслэлийнхээ бүтээн байгуулалтын ажилд иргэдийнхээ оролцоог сайтар хангаж өгөх шаардлага бий гэдгийг ч дурьдлаа. Мөн төрийн үйлчилгээний хүртээмж муу, ачаалал хэт өндөр байгаа Сонгинохайрхан, Баянзүрх дүүргүүдийг хуваах хотын даргын саналыг дэмжиж, УИХ-аар хэлэлцүүлэх нь зүйтэй гэсэн санал гарлаа. Асуулт асууж, санал шүүмж явсны эцэст Нийслэлийн эдийн засаг, нийгмийг 2019 онд хөгжүүлэх үндсэн чиглэлийг баталж, Нийслэлийн Засаг дарга бөгөөд Улаанбаатар хотын Захирагч С.Батболдын 2017-2018 оны үйл ажиллагааны мөрийн хөтөлбөрийн хэрэгжилт, үндсэн чиглэлийн биелэлтийг “Хангалттай” гэж НИТХ үзлээ гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.