УИХ-ын Байгаль орчин, хүнс, хөдөө аж ахуйн байнгын хорооноос Засгийн газарт Мазаалай баавгайг хамгаалах арга хэмжээний тухай тогтоол хүргүүлсэн байна. УИХ-ын Байгаль орчин, хүнс, хөдөө аж ахуйн байнгын хороо ШУА-ийн Биологийн бага чуулганы хамтарсан хэлэлцүүлгээс гаргасан зөвлөмж, Монгол Улсын Их Хурлын тухай хуулийг 21 дүгээр зүйлийн 21.5 дахь хэсгийг үндэслэн тогтоол хүргүүлжээ.
Тогтоолд байгаль цаг уурын өөрчлөлт, хоол тэжээлийн хомсдолоос болж тархац нөөц нь эрс багассан Мазаалай баавгайг хамгаалах, тоо толгойг нь үржүүлэх талаар үндэсний хөтөлбөр боловсруулан хэрэгжүүлэхийг даалгасан байна. Мөн ШУА-ийн Биологийн хүрээлэнд хийгдэж буй Мазаалай баавгайн биологи-экологи болон генетикийн судалгааны ажлыг эрчимжүүлэн лабораторийн материаллаг баазыг бэхжүүлэхэд санхүүгийн дэмжлэг үзүүлэх, Мазаалай баавгайг хамгаалах, өсгөн үржүүлэх ажилд орон нутгийн удирдлага, иргэд төрийн болон төрийн бус байгууллагуудын оролцоог дэмжихийг тусгав.
Тогтоолын биелэлтийг 2014 оны нэгдүгээр улиралд багтаан Байнгын хороонд танилцуулах аж.