НҮБ-ын Ерөнхий асамблей 1992 оноос эхэлж жил бүрийн 10 дугаар сарын 1-ний өдрийг олон улсын Ахмадын баяр болгон тэмдэглэхийг дэлхий даяар албан ёсоор тунхагласан байдаг. Монгол улс уг баярыг 25 дахь жилдээ тэмдэглэж байгаа бөгөөд “Улаанбаатар зам засвар, арчлалтын газар” ОНӨААТҮГ нь 2017 оны 09 дүгээр сарын 23-ны өдөр Хүй долоон худагт дахь “Монгол наадам” цогцолборт ахмадуудаа хүлээн авч, хүндэтгэл үзүүллээ.
Тус газраас тэтгэвэрт гарсан нийт 74 ахмад уг арга хэмжээнд хүрэлцэн ирсэн юм. Хүндэтгэл үзүүлэх арга хэмжээг Орлогч дарга Ё.Батболд нээж үг хэлэхдээ 2017 онд хийсэн Баянгол дүүргийн 10 дугаар хорооллын тохижилтын ажил, ХААИС-ийн өргөтгөл, шинэчлэлийн ажил зэрэг томоохон бүтээн байгуулалтын ажлуудаа онцлон сонирхуулав. Арга хэмжээг Улаанбаатар Чуулгын дуучин Н.Бямбадорж хөтлөн явуулж, МУСТА Н.Алтантуяагийн хамт ая дуугаа өргөн барьсан. Мөн Олон улсын хүүхдийн эрхийг хамгаалах өдрийг угтан зохион байгуулсан “Миний мөрөөдлийн зам” уралдааны “Шүлэг”-ийн төрөлд тэргүүн байр эзэлсэн Б.Ундрахбаяр өөрийн уран бүтээлээрээ ахмадууддаа бэлэг барилаа. Энэ удаагийн хүндэтгэл үзүүлэх арга хэмжээ нь ахмад настнуудыг эрүүл агаарт гаргаж, тэднийг тав тухтай хуучлах нөхцөлийг бүрдүүлж өгсөнөөрөө ихээхэн онцлогтой юм. Нөгөөтэйгүүр нийслэлийн байгууллагуудын хамтын ажиллагааг өргөжүүлэх эхлэл болсон. Баярын үйл ажиллагааг хааж Орлогч дарга Ё.Батболд үг хэлж, ахмадууддаа Сар шинийн баярын үйл ажиллагаа бүхий CD бичлэг, гарын бэлэгийн хамт гардуулж, үйл ажиллагаа өндөрлөлөө гэж Улаанбаатар зам засвар, арчлалтын газраас мэдээллээ.