Нийслэлийн Засаг дарга бөгөөд Улаанбаатар хотын захирагч С.Батболд Бүгд
Найрамдах Австри Улсын Бээжин дэх Элчин сайдын яамны худалдааны аташе
ноён Майкл Таншицтэй уулзлаа. Австрийн Засгийн газраас 2011 оны
гэрээгээр манай улсад 40 сая еврогийн хөнгөлөлттэй зээл олгосон. Уг
зээлээр Улаанбаатар хотын 4 эмнэлэгт тоног төхөөрөмж нийлүүлж, онцгой
байдлын газар 15 давхраас дээш өндөр байшинд гарсан гал унтраах машин
авсан ба УСУГ-т 7 сая еврогийн “Улаанбаатар хотын цэвэр усны хоолойг
шуудуу ухалгүйгээр шинэчлэх технологийг нэвтрүүлэх” төслийн ажлыг
эхлүүлсэн байна. Эдгээр төслүүд амжилттай хэрэгжиж байгаатай
холбоотойгоор дараагийн 40 сая еврогийн зээл Их хурлаар батлагдаж, 2017
оноос хэрэгжүүлж эхлэхээр зорьж байгаа тул ноён Майкл Таншиц энэхүү
зээлээр ямар ямар төсөл хэрэгжүүлэх талаар санал солилцохоор уулзаж
байгаа юм.
Хотын дарга уг зээлээр санхүүжүүлэх боломжтой
төслүүдийн саналыг хэллээ. Тэрээр Австри улсын хөнгөлөлттэй зээлээр олон
улсын стандартад нийцсэн шарил хадгалах газрыг Улаанбаатар хотод
байгуулах, Хаягдал хуванцар дахин боловсруулах үйлдвэрийг Улаанбаатар
хотод байгуулах зэрэг хэд хэдэн төсөл дурьдлаа. Бүгд Найрамдах Австри
Улсын Бээжин дэх Элчин сайдын яамны худалдааны аташе Майкл Таншиц хотын
даргын танилцуулсан төслүүдийн саналтай танилцаад сүүлийн жилүүдэд 2
улсын эдийн засгийн харилцаа илүү идэвхжиж байгааг онцоллоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.