Монгол Улсын Боловсрол, шинжлэх ухааны яам, Холбооны Бүгд Найрамдах
Герман Улсын Эдийн засгийн хамтын ажиллагаа, хөгжлийн яам хамтран Ашигт
малтмал, технологийн дээд сургуулийг монголд байгуулах санамж бичигт
өчигдөр гарын үсэг зурлаа.Санамж
бичгийг БШУЯ-ны Төрийн нарийн бичгийн дарга Ш.Булга-Эрдэнэ, Германы
Эдийн засгийн хамтын ажиллагаа, хөгжлийн яамны төрийн нарийн бичгийн
дарга хатагтай Г.Копп нар үзэглэсэн юм.
Талууд
энэ үеэр Монгол-Германы ашигт малтмал, технологийн дээд сургууль нь
Монголын дээд боловсролын салбарт загвар жишиг болохуйц, Европын
стандартад нийцсэн, ажил олгогч, төрийн байгууллага болон хувийн хэвшил,
бусад түншүүдийн оролцоог хангасан, төрийн өмчийн дээд боловсролын
байгууллага байна гэж мэдэгдэв.
Мөн Монгол Улсын Боловсрол,
шинжлэх ухааны яам, Холбооны Бүгд Найрамдах Герман Улсын Эдийн засгийн
хамтын ажиллагаа, хөгжлийн яам Монгол Улсад Монгол-Германы ашигт
малтмал, технологийн дээд сургууль байгуулах талаар өнөөг хүртэл хоёр
талаас гаргасан хүчин чармайлтыг сайшаан тэмдэглэж, Монгол-Германы
ашигт малтмал, технологийн дээд сургуулийн сургалтын үйл ажиллагааг
2013-2014 оны хичээлийн жилд эхлүүлэхээр тогтлоо.
Энэ үеэр
ХБНГУ-ын Эдийн засаг, хөгжлийн яамны Төрийн нарийн бичгийн дарга Г.Копп
хэлсэн үгэндээ "Манай хоёр улсын Засгийн газар хоорондын хамтран
байгуулах сургуулийн урьдчилсан гэрээнд гарын үсэг зурсандаа баяртай
байна. Танай улсад уул уурхайн салбар эрчимтэй хөгжиж байгаатай
уялдаад өндөр мэдлэгтэй боловсон хүчин шаардлагатай. Энэ сургуулийн
зорилго нь хаана ч ажиллаж чадах чадвартай мэргэжилтэн бэлтгэх юм.
Манай улсаас эхний ээлжинд дөрвөн сая евро гаргаж байна. Хоёр улсын
хамтарсан сургуулийг дэлхийд нэр хүндтэй болно гэдэгт итгэж байна"
гэсэн юм.
Харин БШУ-ны сайд Л.Гантөмөр "Хоёр улсын засгийн
газрын шийдвэрээр Европийн стандартад нийцсэн Ашигт малтмал технологийн
дээд сургуулийг байгуулж байгаа нь манай улсын хувьд том амжилт юм.
Эхний ээлжинд 100 оюутан элсүүлэхээр төлөвлөж байна. Налайх дүүрэгт
тус сургуулийн хичээлийн байр бэлэн болсон. Ирэх ёсдүгээр сараас
элсэлтээ авна" гэдгийг хэллээ.
Ц.Гэрэлчимэг
