БОНХАЖЯ-наас ирэх сарын 15-нд Улаанбаатар хотноо “Байгалийн нөөцийн хамтын менежмент” нөхөрлөлийн үндэсний чуулганыг зохион байгуулах гэж байгаа билээ. Улсын хэмжээнд байгалийн нөөцийн хамтын менежментийн 1629 нөхөрлөл 8.2 сая га талбайг хариуцан хамгаалж, үйл ажиллагаа явуулж байгаагийн 1218 нөхөрлөл нь 3,1 сая га талбай бүхий ойн санг гэрээгээр эзэмшиж байгаа ажээ. Эдгээр нөхөрлөлд нийт 16994 өрхийн 41295 гишүүн хамрагдаж байгаагийн 1148 нь идэвхтэн байгаль хамгаалагчаар ажилладаг байна.
Чуулганы зорилго нь эдгээр нөхөрлөлийг нэгдсэн зохион байгуулалтад оруулах, байгалийн нөөцийн хамтын менежментийг хөгжүүлэхэд оролцогч талуудын хамтын ажиллагааг шинэ төвшинд гаргах , төрөөс энэ чиглэлээр цаашид хэрхэн хамтран ажиллах, тэдгээрт үзүүлэх дэмжлэг, үйлчилгээг өргөтгөх боломж арга замын талаар өргөн хүрээнд хэлэлцэх юм.Нутгийн иргэдэд түшиглэсэн байгалийн нөөцийн хамтын менежментийг төлөвшүүлж, нөхөрлөлийг урт хугацаанд тогтвортой ажиллах нөхцөл боломжийг бүрдүүлэх нь өргөн уудам нутаг дэвсгэртэй, хүн ам цөөтэй манай орны хувьд байгаль орчноо хамгаалж, унаган төрхөөр нь хадгалан авч үлдэх, хяналт тавих чухал арга хэрэгсэл гэж албаныхан үзэж байна.
Тиймээс “Байгалийн нөөцийн хамтын менежмент” нөхөрлөлийн үндэсний чуулганыг зохион байгуулах зарим ажлын хүрээнд салбар яамаас бэлтгэл ажлыг хангаж эхэлсэн байна. Тухайлбал, БОНХАЖЯ-наас чуулганыг угтсан бэлтгэл ажлын хүрээнд орон нутагт байгаль хамгаалах чиглэлээр үйл ажиллагаа явуулж буй нөхөрлөлд учирч буй бэрхшээл, тулгамдаж буй асуудлыг нээн илрүүлэх, тэдгээрийг цаашид хэрхэн шийдвэрлэх талаар 120 гаруй байгаль хамгаалах нөхөрлөлийн төлөөлөл оролцсон хоёр удаагийн зөвлөлдөх уулзалтыг Төв, Сэлэнгэ аймагт энэ сарын 19, 20-ны өдрүүдэд зохион байгууллаа.
Зөвлөлдөх уулзалтад БОНХАЖЯ-ны ТЗУГ-ын даргын албан үүргийг түр орлон гүйцэтгэгч Ө.Сумъяабаатар, ахлах мэргэжилтэн Б.Доржготов, С.Батцэцэг, Байгаль хамгаалах сангийн захирал Х.Батжаргал, Байгаль хамгаалал, ногоон хөгжлийн нөхөрлөлүүдийн үндэсний холбооны гүйцэтгэх захирал Д.Гансэлэм, Сэлэнгэ аймгийн БОАЖГ-ын дарга Б.Батзориг, Ойн албаны дарга н.Цэнгэлзаяа, Төв аймгийн БОАЖГ-ын дарга Ж.Батцэнгэл нар оролцож, “Үйл ажиллагаа явуулж буй байгаль хамгаалах нөхөрлөлийн өнөөгийн байдал, тулгамдаж буй асуудлууд, цаашдын зорилт”, “Байгалийн нөөц ашигласны төлбөрийг цаашид хэрхэн ашиглах нь зохистой, нөхөрөлөлүүдийг санхүүгийн хувьд чадавхижуулах боломж, арга зам” сэдвүүдээр мэдээлэл хийж, асуулт хариулт өрнүүлж, санал солилцлоо.