Уулзалтын үеэр Гадаад харилцааны сайд Л.Болд Улаанбаатар хотноо болж буй АОХН-ийн Сайд нарын 7 дугаар бага хуралд хүрэлцэн ирсэнд, мөн Ардчилсан орнуудын хамтын нийгэмлэг (АОХН)-ийн дарга орны хувьд Монгол Улсын зохион байгуулж байгаа энэхүү арга хэмжээнд Киргизийн тал идэвхтэй оролцож байгаад Киргизийн Гадаад хэргийн сайд Э.Абдылдаевт хувиасаа болон Засгийн газрынхаа өмнөөс талархал илэрхийлэв.
АОХН-ийг амжилттай даргалж буй Монгол Улс нь ардчиллыг хөгжүүлэхийн зэрэгцээ эдийн засгийн өөрчлөлт шинэчлэлтийг хамтатган хэрэгжүүлж буйн тод жишээ улс юм хэмээн Киргизийн тал онцлон тэмдэглээд Сайд нарын 7 дугаар бага хурлын үйл ажиллагаанд амжилт хүслээ.
2012 оны 4 дүгээр сард Монгол Улсын Ерөнхийлөгчийн БНКир.Улсад хийсэн албан ёсны айлчлал, Киргиз Улсын Гадаад хэргийн сайдын 2012 оны 11 дүгээр сард Монгол Улсад хийсэн албан ёсны айлчлал нь Монгол, Киргизийн орчин цагийн харилцааг хөгжүүлэх чиглэлүүдийг тодорхойлж, хоёр орны харилцаа, хамтын ажиллагаа шинэ шатанд гарсныг болон сүүлийн үед улс төрийн яриа, хэлэлцээ эрчимтэй хөгжиж байгааг талууд онцлон тэмдэглэв.
Гадаад хэргийн сайд нар хоёр талын болон олон улсын харилцааны асуудлаар санал солилцож, далайд гарцгүй хөгжиж байгаа орнуудын олон улсын судалгааны төв байгуулах тухай олон талт хэлэлцээрт Киргиз улс нэгдэж орно гэж найдаж байгааг монголын тал илэрхийлэв.