Барилгын салбарын 2013-2015 оны хамтын / тарифын / хэлэлцээрт Барилга, хот байгуулалтын сайд Ц.Баярсайхан, Монголын барилгачдын холбооны ерөнхийлөгч М.Батбаатар, Монголын барилгачдын үйлдвэрчний эвлэлүүдийн холбооны дарга Б.Батцогт нар гарын үсэг зурлаа.
Барилга, хот байгуулалт, барилгын материалын үйлдвэрлэлийн салбарын хөдөлмөрийн харилцаанд оролцогч талуудын эрх ашиг болон салбарын хөгжлийн тулгамдсан асуудлуудыг тодорхойлж, үе шаттайгаар шийдвэрлэх зорилгоор энэхүү хэлэлцээрийг байгуулав.
Барилгын салбарыг хөгжүүлэхэд тулгамдсан асуудлыг шийдвэрлэх хүрээнд “Барилгын салбарын удирдах ажилтны зөвлөлгөөн”-ийг жил бүр хамтран зохион байгуулах, Шинэ бүтээн байгуулалт дунд хугацааны зорилтот хөтөлбөр болон “Барилгын салбарыг дэмжих улмаар орон сууцны үнэ тогтворжуулах дэд хөтөлбөр, Барилгын материалын үйлдвэрлэлийг дэмжих хөтөлбөр”, “100 мянган айлын орон сууц” төслийг хэрэгжүүлэх арга хэмжээг дэмжиж ажиллах, Барилгын салбарт үйл ажиллагаа эрхэлж буй аж ахуйн нэгжийн үйл ажиллагаанд чанарын удирдлагын ISO 90001 болон хөдөлмөрийн аюулгүй байдал, эрүүл ахуйн хяналтын OHSAS 18001 стандартуудыг нэвтрүүлэх чиглэлээр барилгын салбарын төрийн болон төрийн бус байгууллагууд, мэргэжлийн холбоод хамтарч ажиллахаар хэлэлцээрт тусгалаа.
Хөдөлмөр эрхлэлтийн тал дээр барилгын салбарын эрэлт, хэрэгцээнд нийцэх мэргэжил, ур чадвартай үндэсний ажиллах хүч бэлтгэхэд “Мэргэжлийн боловсролыг дэмжих сан” байгуулж ажиллуулахаар тусгажээ. Их, дээд сургууль, коллеж, Мэргэжлийн сургалт, үйлдвэрлэлийн төвд салбарын чиглэлээр суралцагсдыг ажлын байран дээр дадлагажуулах, ажлын байраар хангах ажлыг зохион байгуулах юм.
Тарифын хэлэлцээрт дээрхи асуудлуудаас гадна цалин хөлс, хөдөлмөр хамгаалал нийгмийн баталгаа, нийгмийн түншлэлийн талаар талууд гарын үсэг зурж баталгаажууллаа.
Цалин хөлсний талаар хэлэлцээрт барилгын салбарт ажиллагсдын үндсэн цалинг нэмэгдүүлэх асуудлыг аж ахуйн нэгж байгууллагууд хамтын гэрээгээр зохицуулахдаа дараах чиглэлийг баримтлахаар боллоо.
“Тариф цалингийн жишиг шинэчлэн батлах тухай” салбарын сайдын 2009 оны 263 дугаар тушаалын 3-д заасан ”Барилга байгууламжийн төсөвт өртөгт тусгагдсан ажилчдын цалингийн эх үүсвэр нэмэгдсэнтэй холбогдуулан барилгын мэргэжилтэй ажилчдыг 3 дугаар зэргийн , туслах ажилчдыг 1 дүгээр зэргийн хийснээрх тарифт цалингийн жишгээс багагүй хэмжээгээр цалинжуулж байхаар тогтоосугай” гэсэн заалтын дагуу барилга, барилгын материалын үйлдвэрлэлийн ажиллагсдын хөдөлмөрийн хөлсний доод хэмжээг 358848 / гурван зуун тавин найман мянга найман зуун дөчин найм/ төгрөг байна. /Барилгын салбарт ажиллаж байгаа тогооч, үйлчлэгч, харуул зэрэгт хамаарна./ Хэрэгжилтийн байдалд жилд хоёроос доошгүй удаа судалгаа дүгнэлт хийж хэрэгжилтэд талууд хяналт тавьж ажиллана гэлээ.