2009 оны НҮБ-ын Ерөнхий ассамблейн хуралдаанаар дөрөвдүгээр сарын 22-ны өдрийг “Эх дэлхийн өдөр” болгон тэмдэглэж байхаар болжээ. Эх дэлхийн өдрөөр хүн бүр амьдарч буй цэнхэр гаригтаа талархал илэрхийлэх боломжтой юм. Дэлхийн өнцөг булан бүрт энэ өдрийг ёслол төгөлдөр тэмдэглэж байна. Манай улсад энэхүү өдрийг тохиолдуулан олон үйл явдал өрнөсний нэг нь нийслэлийн Хүүхэд залуучуудын ордонд болсон “Эх дэлхийдээ барих бэлэг – 1 метр.кв” 1,5 сарын аян”-ы нээлтийн ажиллагаа байлаа. Аяны зорилго нь хүн бүр өөрийн амьдарч, ажиллаж буй орчныхоо 1 метр.кв 
талбайг нөхөн сэргээж, мод бут тарьж, цэцэрлэгжүүлэх, хөрсний бохирдолыг бууруулахын төлөө нэгдэн ажиллахад чиглэж байгаа юм. Уг үйл ажиллагаанд БОНХ-ийн Сайд С.Оюун, Хэвлэл мэдээллийн албаны дарга Ч.Базар, Нийслэлийн Иргэдийн Хурлын төлөөлөгч Ц.Баатархүү, Швейцарын хөгжлийн агентлаг, Байгаль орчны мэдээлэл сургалтын төвийн удирдлагууд, нийслэлийн ЕБС-ийн 200 гаруй багш, сурагчид оролцлоо. Уулзалт БОНХ-ийн Сайд С.Оюуны “Уур амьсгалын өөрчлөлт, дэлхийн дулаарал” илтгэлээр эхэлж НИХ-ын төлөөлөгч Ц. Баатархүүгийн “ Эрүүл, аюулгүй нийслэл Улаанбаатар” мэдээллээр үргэлжилсэн. Мөн уулзалтанд оролцсон багш сурагчид боловсрол-шинэчлэл-байгаль орчин, эко сургуулийн манлайлал, эко клубын санаачлага, эко сургуулийн сүлжээ сэдвээр ярилцсан юм. Энэхүү аяныг Эко-сургууль хөтөлбөрөөс санаачлан Байгаль орчин, ногоон хөгжлийн яам, Нийслэлийн засаг даргын тамгын газар, Швейцарын хөгжлийн агентлаг, Байгаль орчны мэдээлэл сургалтын төв зэрэг байгууллагууд дэмжин зохион байгуулж байгаа бөгөөд аян 1,5 сар буюу 45 хоног үргэлжлэх юм. Хүн бүр 1 метр.кв талбайг тохижуулахад оролцон “Эх дэлхий”-дээ бэлэг барьцгаая.
