Эрүүл мэндийн яамнаас сэтгүүлзүйн чиглэлээр мэргэжилтэн бэлтгэдэг сургуулиудтай хамтран оюутнуудад "Эрүүл мэндийн салбарын тогтолцоо, түүний онцлог", "Эрүүл мэндийн мэдээ, мэдээллийг бэлтгэхэд сэтгүүлчийн анхаарах зүйлс, ур чадвар, өөрийнхөө үнэлэмжийг ахиулах нь" сэдвээр цуврал лекц, сургалтыг 10 дугаар сараас эхлэн зохион байгуулж байгаа билээ.
Эрүүл мэндийн үйл явдал, мэдээ, мэдээлэл болон хүний эрүүл мэндэд чиглэсэн зөвлөгөө, зөвлөмжүүд ямар ч үед хүмүүсийн анхаарлын төвд тавигдаж байдаг. Энэхүү мэдээллийг үнэн зөв, цаг алдалгүй хүргэдэг суваг бол хэвлэл мэдээлэл /түүний хэрэгсэл/ юм. Эрүүл мэндийн сэдвээр бичдэг, туурвидаг сэтгүүлч, уран бүтээлчдийг нэмэгдүүлэх, тэдний эрүүл мэндийн мэдлэгийг тэлэх зорилгоор 2014 оны 10 дугаар сарын 02-ны өдөр Хүмүүнлэгийн Ухааны Их сургууль, Кино Урлагийн Дээд сургуулийн сэтгүүл зүйн ангийн оюутнуудад сургалт зохион байгуулсан юм.
Тэгвэл энэ удаа буюу 2014 оны 11 дүгээр сарын 13,14-ний өдрүүдэд Монгол улсын их сургууль, Монгол улсын боловсролын их сургууль, СУИС-ийн Радио, телевиз, медиа урлагийн сургууль, Отгонтэнгэр их сургуулийн 400 гаруй оюутанд сургалт явууллаа.
Эрүүл мэндийн тогтолцоо, эрүүл мэндийн асуудлууд, энэ чиглэлээр сэтгүүл зүйн бүтээл туурвих зэрэг агуулгын хүрээнд оюутан залууст мэдээлэл өгсөн. Иргэн хүний эрүүл мэндийн боловсролыг тогтмол нэмэгдүүлж, хэрэгцээт мэдээ, мэдээлэл, зөвлөгөө зөвлөмжөөр давхар хангаж байдаг салбаруудын нэг бол сэтгүүл зүйн салбар юм.
Сургалтын үеэр оролцогч оюутнууд олон асуудлыг хөндөн асууж байв. Зөв хооллолт, эрүүл зан үйл гэж юу болох зэрэг олон сэдвээр илтгэл танилцуулсан багш нараас асуулт асууж, сонирхож байсан нь залуусын дунд өөрсдийн эрүүл мэнд, амьдралын зөв дадалдаа анхаарах болсныг харуулж байсан.
