2000 оны Парисын тунхагт уриалсны дагуу Хорт хавдартай тэмцэх Олон улсын холбоо /UICC/ нь 2005 оноос Дэлхийн хэмжээнд хорт хавдрын эсрэг үйл ажиллагааг санаачлан жил бүрийн 02 дугаар сарын 04-ний өдрийг “Дэлхийн Хорт хавдартай тэмцэх өдөр”, 11 дүгээр сарын эхний 14 хоногийг “Дэлхийн Хорт хавдартай тэмцэх аян” болгон тэмдэглэн өнгөрүүлдэг уламжлалтай билээ.
Аймгийн хэмжээнд тус аяныг тэмдэглэх удирдамжийг гарган аймгийн Засаг даргын санхүүгийн дэмжлэгээр дараах үйл ажиллагааг зохион байгууллаа. Үүнд:
Элэгний хорт хавдрыг эрт илрүүлэх стратегийг орон нутагт хэрэгжүүлэх нээлтийн үйл ажиллагааг зохион байгуулж, орон нутгийн болон эрүүл мэндийн салбарын удирдлага, эмч, эмнэлгийн мэргэжилтэн, иргэд үйлчлүүлэгсэд оролцов.
“Хавдар, хөнгөвчлөх тусламж үйлчилгээг зохистой хөгжүүлснээр амьдралын чанарыг дээшлүүлнэ” сэдэвт чанарын нээлттэй өдөрлөгийг Хавдар, хөнгөвчлөх эмчилгээний тасаг дээр зохион байгуулж, энэ онд хийсэн тасаг, кабинетын үйл ажиллагааг танилцуулснаас гадна хорт хавдраас сэргийлэх хүнсний бүтээгдэхүүний талаар эрүүл мэндийн боловсрол олгох сургалт сурталчилгаа зохион байгууллаа.
“Элэгний анхдагч өмөнгийн оношилгоо, эмчилгээний орчин үеийн чиг хандлага, эрт илрүүлэлт, урьдчилан сэргийлэлт, хөнгөвчлөх тусламж үйлчилгээ” сэдэвт сургалтыг сум, өрх, БОЭТ-ийн эмч нарт зохион байгуулав.
Аймгийн болон Хэрлэн сумын удирдах ажилтуудын шуурхай хуралдаан дээр, “Элэгний хорт хавдрын өвчлөл, нас баралтын өнөөгийн байдал, эрт илрүүлгийн стратеги” сэдвээр мэдээлэл хийснээс гадна орон нутгийн Мижи телевиз, TV6 телевиз, DTV телевиз, “Дорнод” сонин зэрэг хэвлэл мэдээллийн хэрэгслээр Дэлхийн аян болон эрт илрүүлгийн стратегийн талаар мэдээлэл, сурталчилгааг хийж байна.
