Бүгд Найрамдах Филиппин Улсын нийслэл Манила хотноо эхэлсэн ДЭМБ-ын Номхон далайн баруун бүсийн хорооны 65 дугаар чуулганд Монгол Улсын Засгийн Газрыг төлөөлж Эрүүл мэндийн сайд Н.Удвал тэргүүтэй төлөөлөгчид оролцсон. Чуулганы хоёр дахь өдөр Эрүүл мэндийн сайд Н.Удвал хөтөлбөрүүдийн явцын тайланг хэлэлцэх хуралд оролцож, үг хэллээ. Тэрээр хэлэхдээ, “Монгол улс ОУЭМД-ийн үндсэн чадавхи бүрдүүлэх, ОУЭМД-ийг хэрэгжүүлэх бүсийн үндсэн баримт бичиг болох APSED-ийг хэрэгжүүлэх зорилгоор 2008 онд батлагдсан төлөвлөгөөг хэрэгжүүлэхийн зэрэгцээ дэлхийн улс орнуудад шинэ сэргэж байгаа болон шинээр бүртгэгдэж байгаа халдварт бус өвчний үеийн бэлэн байдлыг хангах олон үйл ажиллагааг шинээр эхлэн хэрэгжүүлж байна.
Нийгмийн эрүүл мэндийн ноцтой байдал үүссэн үед хариу арга хэмжээг хугацаа алдалгүй авч хэрэгжүүлэх үйл ажиллагааг нэгдсэн зохицуулалтаар хангаж, хүн амд, бусад сонирхогч талуудад бодитой, үнэн зөв мэдээллийг түгээх "Шуурхай удирдлагын төв"-ийг ЭМЯ-ны дэргэд 2014 оны 09 сард нээн ажиллуулж байна. Энэхүү төвийн үйл ажиллагааг эхлүүлэхэд техникийн болон санхүүгийн гүн туслалцаа үзүүлсэн ДЭМБ-ын Номхон далайн баруун бүсийн төвд ЭМЯ-ны нэрийн өмнөөс талархаж буйгаа дахин илэрхийлэхэд таатай байна” гэлээ. Мөн ДЭМБ-ын дэмжлэгтэйгээр Монгол Улсад байгуулагдсан “Шуурхай удирдлагын төв”-ийн үйл ажиллагааг цаашид тогтворжуулах, чадавхийг бэхжүүлэх, ДЭМБ-аас үргэлжлүүлэн дэмжиж, хамтран ажиллахыг хүслээ.
