Эрүүл мэндийн салбарын "Нээлттэй хаалганы өдөр"-т Сэтгэцийн эрүүл мэндийн үндэсний төв оролцлоо.
Тэд өнгөрсөн 9 дүгээр сарын 25-нд ашиглалтад орсон СЭМҮТ-ийн шинэ цогцолбор, брэнд бүүкээ танилцуулж, төвийн үйл ажиллагаа, тоног төхөөрөмжийн шинэчлэл, оношилгооны тест, сэтгэц нөлөөт эм бэлдмэлүүдийг олон нийт, өдөрлөгт оролцогч бусад байгууллагуудад сурталчлан танилцуулав. Мөн тус эмнэлэгт хэвтэн эмчлүүлэгчдийн хийсэн бүтээлүүдийг үзвэр болгон дэлгэсэн нь содон байлаа.
Энэхүү эрүүл мэндийн салбарын нэг өдрийн нээлттэй өдөрлөгт СЭМҮТ-ийн нийт 200 гаруй эмч, эрүүл мэндийн ажилтнууд оролцсоноос АШУҮИС-ийн Сэтгэцийн эрүүл мэндийн тэнхим, СЭМ-ийн клубын 60 багш, оюутнууд оролцжээ. Тус төвөөс өдөрлөгт оролцсон 295 хүний артерийн даралтыг үзэж, биеийн жин, өндрийг хэмжин зөвлөгөө өгч ажилласан байна. Түүнчлэн сэтгэл зүйн зөвлөгөөг 38, донтох эмгэгийн талаарх зөвлөгөөг 65 хүнд тус тус өгсөн тухай мэдээлж байна.
“Стрессийг хэрхэн даван туулах вэ”, “Нойрны хямрал”, “Сэтгэл түгшилт”, “Сэтгэл гутрал”, “Тайлбарлаж боломгүй биеийн зовиур шаналгаа”, “Гамшигийн үед үзүүлэх сэтгэцийн эрүүл мэндийн тусламж”, “Ахмад настны сэтгэцийн эрүүл мэнд”, “Шизофрени эмгэгтэй хүмүүсийн ар гэрт өгөх зөвлөгөө” зэрэг 8 төрлийн 2000 ширхэг гарын авлага тараасан. Мөн 30 ширхэг зурагт хуудас, “Сэтгэл зүй, оюун санааны эмчилгээний хөтөлбөр” миннесота загвар эмчилгээний ном 50 ширхэгийг бусад оролцож буй байгууллагууд, нийт хүн амд тараасан байна.
Дэлхийн сэтгэцийн эрүүл мэндийн өдрийг тохиолдуулан “ШИЗОФРЕНИ-тэй ХҮМҮҮСТ ТУСЛАЯ” уриан дор 2014 оны 10 дугаар сарын 11-ний өдөр тэмдэглэн өнгөрүүлсэн бөгөөд СЭМҮТ-ийн эмч, эрүүл мэндийн ажилтнууд, АШУҮИС-ийн АУС, СЭМ-ийн тэнхмийн багш, СЭМ-ийн клубын оюутнууд нийтийг хамарсан дасгал хөдөлгөөн хийлгэж, гарын авлага, тараах материалыг хүмүүст тарааж, иргэдэд мэдээлэл өгч ажиллав.
