Эрүүл мэндийн салбарын “Нээлттэй хаалганы өдөр” Чингисийн талбайд өнгөрсөн амралтын өдрүүдэд болж өндөрлөлөө.
Өдөрлөгт ЭМЯ, Нийслэлийн эрүүл мэндийн газар болон 1-3 дугаар шатлалын эрүүл мэндийн байгууллага, тусгай мэргэжлийн төвүүд оролцож, үйл ажиллагаагаа иргэдэд сурталчлан, үнэ төлбөргүй зөвлөгөө өгсөн юм.
Энэхүү өдөрлөгийн онцлог нь иргэд эрүүл мэндийн цогц мэдээллийг нэг дороос авахын зэрэгцээ эрүүл мэндийн салбарын үйл ажиллагаатай танилцах боломжийг бүрдүүлсэн нь байв.
Улсын клиникийн гуравдугаар эмнэлгийн эмч нарын хувьд гурван төрлийн үзлэг хийж байсан бөгөөд өнгөрсөн ням гарагт нийтдээ 500 орчим иргэдийг үзлэгт хамруулжээ. Харин Халдварт өвчин судлалын үндэсний төвийн эмч мэргэжилтнүүд залуучууд голдуу цуглуулсан байлаа. Учир нь тэд бэлгийн замын халдарт өвчин болоод түүнээс урьдчилан сэргийлэх талаар яриа таниулга хийж байсан юм. Тэд халдварт өвчний талаарх мэдээлэл, зөвлөгөө өгч, танилцуулгын хамт бэлгэвч тараасан. Улмаар видео танилцуулгаас гадна хавдар өвчний үзлэг, урьдчилан сэргийлэх аргыг иргэдэд танилцуулж байлаа.
Сүүлийн үед олон хүний тэр дундаа эмэгтэйчүүдийн эрүүл мэндэд сөргөөр нөлөөлдөг таргалалтын талаарх танилцуулга цөөнгүй хүмүүсийн анхаарлыг татаж байлаа. Дүүргүүдийн эрүүл мэндийн төвийн эмч, мэргэжилтнүүд жин, өндөр хэмжиж, тухайн хүний байх ёстой жин болоод илүүдэл жинг тогтоож, хэрхэн яаж жин хасах талаар зөвлөгөө өгч байсан. Таргалалтыг саяхан болтол өвчинд тооцдоггүй байсан. Тэгвэл таргалалт нь бие махбодийн бодисын солилцооны үйл ажиллагааг алдагдуулж байдаг өвчин ажээ. Энэ өвчинд эмэгтэйчүүд зонхилон өртдөг ч сүүлийн үед эрчүүд, хүүхдүүд хүртэл өртөх болжээ. Их идэх, буруу хооллох, хөдөлгөөний хомсдолоос үүдсэн энэхүү өвчинд өртөхгүйн тулд ямар дасгалыг хэрхэн хийх талаарх эмчийн зөвлөгөө сонирхолтой байсан юм.
Улсын клиникийн нэг, хоёр, гуравдугаар эмнэлэг, Хавдар судлалын үндэсний төв, Халдварт өвчин судлалын төв, Гэмтэл согог судлалын үндэсний төв болон дүүргүүдийн эрүүл мэндийн нэгдэл, Нийгмийн эрүүл мэндийн хүрээлэн гээд нийслэлд байрлах бүхий л эмнэлгүүдийн эмч, мэргэжилтнүүд эрүүл аж төрөх, эрүүл мэндээ хамгаалах, урьдчилан сэргийлэх зөвлөгөө өгөхөөс гадна чих, хамар, хоолой, зүрх судас, хоол боловсруулах эрхтэн системийн үзлэг хийж, артерийн даралт үзсэн юм.
Тус өдөрлөг хоёр өдрийн турш зохион байгуулагдсан ч дараалал ихтэй байсан. Ялангуяа иргэд шууд зорьж очоод үзүүлэх боломжгүй гурав дахь шатны эмнэлэг буюу клиникийн эмнэлгийн эмч нарын үзлэг илүү их дараалалтай байсан юм. Сүүлийн үед өвдсөн хүн эмнэлэг зорьдог гэсэн ойлголт хуучирч, өвдөхөөсөө өмнө эмчээс зөвлөгөө авдаг болсныг эмч нар бас сайшаан хэлж байлаа. Ялангуяа өндөр настнуудын хувьд зөвлөгөө авах, урьдчилан сэргийлэх үзлэгт хамрагдах нь нэмэгджээ.
Өдөрлөгийн хүрээнд иргэдийн даатгалын дэвтэргүй байсан ч үнэ төлбөргүй үзлэг хийж, зөвлөгөө өгч байсан юм.
Иргэд “Ийм үйл ажиллагаа явуулж байгаа нь ард иргэд бидэнд хэрэгтэй сайхан үйл явдал болж байна. Тэр дундаа ахмад настан, даатгалын дэвтэргүй иргэд үнэ төлбөргүй үзүүлнэ гэдэг том боломж” хэмээн ам сайтай байлаа.
