Эрүүл мэндийн яам, Боловсрол, шинжлэх ухааны яам хамтран Анагаахын Шинжлэх Ухааны Үндэсний Их Сургуулийн Сувилахуйн сургуулийн 85 жилийн ойн хүрээнд Сувилахуйн олон улсын 3 дугаар их хурлыг Төрийн ордонд зохион байгуулж байна. Эрүүл мэндийн сайд Н.Удвал тус хуралд оролцож үг хэлэхдээ “Сургуулийн түүхт 85 жилийн ойг тохиолдуулан тус сургуулийн үе үеийн эрдэмтэн багш, ажилчид, оюутан сурагчиддаа энэхүү ойн баярын босгон дээр эрүүл энх, аз жаргал, сайн сайхан бүхнийг хүсэн ерөөж, баярын мэнд хүргэн мэндчилж байна. Эрүүл мэндийн салбарт шинэчлэлийн суурь алхмуудыг хийж буй энэ цаг үед салбарын гол хүний нөөц болох сувилагч, эмнэлгийн тусгай мэргэжилтнүүд голлох үүргийг гүйцэтгэж байгаа билээ” гээд хурлын үйл ажиллагаанд амжилт хүслээ. Мөн сайд ажил мэргэжлээрээ бусдыгаа манлайлсан зарим ажилтанд “Эрүүл мэндийн тэргүүний ажилтан” цол тэмдэг гардууллаа.
Хуралд гадаадын 20 гаруй эрдэмтэн, судлаач, Улаанбаатар хот болон орон нутгийн эрүүл мэндийн нэгдэл, I, II, III шатлалын эмнэлэгт ажиллаж байгаа 800 гаруй сувилагч, төлөөлөгч оролцож байна. Салбар хуралдаануудаар Эмнэлгийн мэргэжилтний үйл ажиллагааны хоорондын уялдаа холбоог сайжруулах, сувилахуйн тусламж үйлчилгээний чанарыг дээшлүүлэх, сувилахуйн боловсролыг боловсронгуй болгох, дуураймал орчин дахь сургалтыг өргөжүүлэх зэрэг сэдвүүдээр илтгэл тавьж хэлэлцүүлнэ.
