Эрүүл мэндийн сайд Н.Удвал Их Британи улсын Эрүүл мэндийн байгууллагын төлөөлөгчдийг 2014 оны 10 дугаар сарын 08-нд ЭМЯ-наа хүлээн авч уулзан, сэтгэцийн эрүүл мэндийн тусламж үйлчилгээг сайжруулах талаар ярилцлаа.
Уулзалтад Эрүүл мэндийн сайд Н.Удвал, ЭМЯ-ны БТГ-ын дарга Ц.Цолмонгэрэл, БХЗГ-ын дарга Я.Буянжаргал, СЭМҮТ-ийн дэд захирал О.Ганчулуун, Их Британий талаас профессор Jane Salvage, “Сувилахуй ба хүн ам” Камден болон Ислингтон Эн Эйч эс сангийн захирал, доктор профессор Claire Johnstonis, Сувилахуйн болон судалгааны хэлтсийн захирал Fiona Nolanis, доктор Koye Odutoye, Камден болон Ислингтон Эн Эйч эс сангийн захирал, дэд профессор David Plummer, Их британи улсын үндэсний эрүүл мэндийн тусламжийн захирал асан Stanley нар болон холбогдох мэргэжилтнүүд оролцлоо.
Талууд Их Британи улсын тусламжтайгаар Монгол улсын нийгэм хамт олонд тулгуурласан сэтгэцийн эрүүл мэндийн тусламж үйлчилгээг сайжруулах талаар ярилцлаа. Түүнчлэн СЭМҮТ-д 2 өдрийн сургалт зохион байгуулахаар тогтсон байна.
Сэтгэцийн эрүүл мэндийн ор бүхий эмнэлгээс нийгэм хамт олонд тулгуурласан тусламж үйлчилгээнд шилжих, түүнийг хөгжүүлэхэд шаардагдах нөөц (эмч мэргэжилтэн сургах, дадлагажуулах, хамтарсан судалгаа шинжилгээний ажлыг явуулах, сургалт зохион байгуулах, туршлага судлах, техник болон санхүүгийн тусламж дэмжлэг г.м)-ийг хамтран тодорхойлох, Их Британи улсын “Камден", "Ислингтон” сантай СЭМҮТ-ийн хамтын үйл ажиллагааг бэхжүүлэх шаардлагатай гэж талууд үзлээ.
Монгол Улсын Засгийн газрын 2009 оны 303 дугаар тогтоолоор “Сэтгэцийн эрүүл мэнд” үндэсний хоёр дахь хөтөлбөрийг 2010-2019 онд хэрэгжүүлэхээр баталсан билээ.
“Сэтгэцийн эрүүл мэндийн тухай“ хуулийн шинэчилсэн найруулгыг 2013 оны 01 дүгээр сарын 03-ны өдөр УИХ-аар хэлэлцүүлэн батлуулжээ. Уг хуульд, Сэтгэцийн эрүүл мэндийн ор бүхий эмнэлгээс гадуур үзүүлэх амбулаторийн болон нийгэм хамт олонд түшиглэсэн тусламж, үйлчилгээг хөгжүүлэх асуудлыг хөгжүүлэх асуудлыг түлхүү тусгаж өгсөн байна.
