Геронтологийн үндэсний төвөөс “Олон улсын ахмадын өдөр”-ийг тэмдэглэн өнгөрүүлэх ажлын хүрээнд Завхан аймгийн Түдэвтэй, Шилүүстэй, Өвөрхангай аймгийн Төгрөг, Дорноговь аймгийн Айраг сумдад “Сумын эрүүл мэндийн төвийн настанд үзүүлэх тусламжийг бэхжүүлье” үйл ажиллагааг зохион байгууллаа.
Сургалтыг Геронтологийн үндэсний төв, аймгийн Эрүүл мэндийн газар, сумын Засаг даргын Тамгын газар, Иргэдийн төлөөлөгчдийн хурал, сумын Эрүүл мэндийн төв, ахмадын байгууллага, Замын цагдаагийн газартай хамтран явуулсан. Дээрх үйл ажиллагаанд нийт 61 сумын 99 эмнэлгийн мэргэжилтэн, 47 ахмад настан, 39 түргэний жолооч хамрагдсан бөгөөд Түдэвтэй, Шилүүстэй, Айраг, Төгрөг сумын настнуудад “Цусны даралт ихсэх өвчнийг хянах, эмийн зохистой хэрэглээг төлөвшүүлэх”, “Эх, хүүхдийн эрүүл мэндийг дэмжихэд-настны оролцоо” сэдвээр Геронтологийн үндэсний төвийн сургалтын баг сургалт явууллаа.
Мөн “Эмнэлгийн тусламж, үйлчилгээний чанар хүртээмжийг сайжруулахад жолооч таны оролцоо” сэдэвт сургалтын хүрээнд сумдын жолооч нарт болзошгүй эрсдэлт хүчин зүйл гарахад эмнэлгийн анхан шатны тусламжийг цаг алдалгүй, чанартай хүргэх талаар сургалт явуулж, Завхан аймгийн Замын цагдаагийн газраас түргэний машины техникийн бүрэн бүтэн байдлыг хангаж ажиллахад зөвлөгөө өгч, жолоочийн аюулгүй байдал, машин техникийн бүрэн бүтэн байдлыг шалгаж, үзлэг хийлээ.
Сургалтын явцад “Агаарт хэмнэл”, ”Жавхаат хэмнэл” дасгалын үзүүлбэрийг сургалтын багийн гишүүд, оролцогч нар хамтран хийж, дасгал хөдөлгөөнөөр хичээллэв.
“Сумын эрүүл мэндийн төвийн настанд үзүүлэх тусламжийг бэхжүүлье” сургалтыг зохион байгуулсан нь алслагдсан хөдөө орон нутгийн настнуудад Геронтологи гериатрийн төрөлжсөн мэргэжлийн тусламж, үйлчилгээг хүргэж аймаг сумдын удирдлагаас настны эрүүл мэндийг дэмжих чиглэлд хэрхэн ажиллах мэргэжил арга зүйн зөвлөгөө өгсөн, иргэн хүнд эрүүл идэвхтэй урт наслах талаар мэдлэг мэдээлэл хүргэсэн үр өгөөж ихтэй сургалт боллоо.
