Багануур дүүргийн Засаг даргын 2014 оны А/289 тоот захирамжаар “Боомын халдвараас урьдчилан сэргийлэхэд салбар дундын хамтын үйл ажиллагааг эрчимжүүлье” сэдэвт зөвөлгөөн, үзүүлэх сургууль 2014 оны 10 дугаар сарын 03-нд Багануур дүүрэгт болж өндөрлөв.
Зөвөлгөөнд Зоонозын өвчин судлалын үндэсний төв, Нийслэлийн эрүүл мэндийн газар, Нийслэлийн мал эмнэлэг, Нийслэлийн зоонозын өвчин судлалын төв, Багануур дүүргийн Онцгой байдлын хэлтэс, Цагдаагийн хэлтэс, мал эмнэлгүүд, 5 хорооны Засаг дарга, хороодын малчид, мал бүхий иргэд, Хэнтий аймгийн МХГ, ОБГ, ЗӨСТ, Мал эмнэлэг зэрэг 20 байгууллагын 93 албан хаагч, иргэдийн төлөөлөл оролцлоо.
Зөвөлгөөнийг нээж Багануур дүүргийн Нийгмийн хөгжлийн асуудал хариуцсан Засаг даргын орлогч дарга Т.Отгонболд үг хэлэв. Уг зөвөлгөөнд боом өвчний талаар ЗӨСҮТ, НЗӨСТ, Багануур дүүргийн “Молор чанмань” мал эмнэлэг, 4-р хороо, Хэнтий аймгийн ЗӨСТөвийн оролцогч нар 5 илтгэл тавьж, санал солилцсоны дараа “Хүн, малын боом өвчний голомтод авч хэрэгжүүлэх арга хэмжээ” сэдвээр зохион байгуулсан үзүүлэх сургууль нь практикийн ач холбогдолтой, өгөөжтэй үйл явдал болсон.
“Боомын халдвараас урьдчилан сэргийлэхэд салбар дундын хамтын үйл ажиллагааг эрчимжүүлье” сэдэвт зөвөлгөөнөөс дараах шийдвэрийг гаргаж, хэрэгжүүлэх ажлыг зохион байгуулах хэсгийг томилсон. Үүнд:
- Мэдээ мэдээллийг үнэн зөв, хурдан шуурхай дамжуулах,
- Нийслэлийн нутаг дэвсгэрт зоонозын өвчний тархалтын судалгаа, хүний болон малын өвчний хамтран ажиллах бэлтгэл хангах, сургалт сурталчилгаанд шаардлагатай хөрөнгө санхүүгийн асуудлыг тавьж шийдвэрлүүлэх,
- Зоонозын өвчний сэжигтэй, өвчтэй мал, амьтныгаралтай бүтээгдэхүүнийг хяналт шалгалтын цэгт түр хорих, хадгалах зориулалтын байр, савтай болох, устгах цэг байгуулах, түүхий эд нийлүүлэх цэгтэй болох, малын гаралтай түүхий эдийг төвлөрсөн зориулалтын цэгт бэлтгүүлэх, мал, малын гаралтай бүтээгдэхүүний гарал үүслийн гэрчилгээнд байнгын хяналт тавих,
- Хил залгаа аймаг, сумдын мэргэжлийн байгууллагуудтай хамтран ажиллах үйл ажиллагааг сайжруулах Багануур дүүргийн 1-5 дугаар хорооны нийт 115 өрхийн 356 иргэнд эрүүл мэндийн сургалт сурталчилгаа хийж, ӨЭМТөвийн эмч нар ард иргэдэд үзлэг хийж, эрүүл мэндийн зөвлөгөө өгч ажиллалаа.
ЗООНОЗЫН ӨВЧИН СУДЛАЛЫН ҮНДЭСНИЙ ТӨВ