“Дархлаажуулалтын хууль эрхзүйн орчин, санхүүжилтийн тогтвортой байдал” олон улсын хэлэлцүүлэг болж байна. Тус хэлэлцүүлэгт УИХ-ын Нийгмийн бодлого, боловсрол, соёл, шинжлэх ухааны байнгын хороо, Эрүүл мэндийн яам, Сангийн яам, Татварын ерөнхий газар, Сабин институт-ийн Монгол улс дахь суурин төлөөлөгч болоод Уганда, Вьетнам зэрэг улсаас төлөөлөгчид оролцож байна. Тус хэлэлцүүлгийн үеэр Дархлаажуулалтын тухай хуулийн хэрэгжилтийн өнөөгийн байдал, санхүүжилтийн тогтвортой байдлыг хангах тухай засвар хууль, олон нийттэй хэрхэн хамтран ажиллах талаар, Дархлаажуулалтын санхүүжилтийн тогтвортой байдлыг хангахад Татварын ерөнхий газрын үүрэг оролцооны талаар холбогдох албан тушаалтнууд илтгэл тавьлаа. Мөн бусад улс орнуудын дархлаажуулалтын хууль эрхзүйн орчны талаар мэдээлэл солилцож, хэлэлцүүлэг өрнүүлсэн юм.
Эрүүл мэндийн дэд сайд Ж.Амарсанаа, “Дархлаажуулалтын тухай хуулийн хэрэгжилтийн өнөөгийн байдал, дархлаажуулалтын сангийн тухай” итгэл тавьсан бөгөөд илтгэлдээ Дархлаажуулалтын үр дүнг танилцуулсан юм.
- 1940 онд цагаан цэцэг өвчнийг устгаж чадсан Азийн анхны улс болсон.
- 2000 онд халдварт саа өвчнийг устгасныг баталгаажуулсан гэрчилгээг ДЭМБ-аас гардан авсан.
- 2014 онд улаанбурхан өвчний тархалтыг таслан зогсоосон анхны 4 орны нэг болж ДЭМБ-ын гэрчилгээг авсан.
- Заавал хийх дархлаажуулалтын хамралт 95-99% хүрсэн.
- 2004 оноос сахуу, хөхүүл ханиад, полиомиелитын тохиолдол,
- 2009 оноос хойш улаанбурхан өвчний тохиолдол бүртгэгдээгүй байна.
Мөн Монгол улс:
- Хуулийн хүрээнд дархлаажуулалтын эрх зүйн орчинг бүрдүүлсэн.
- Хууль нь Монгол Улсын хүн амыг халдварт өвчнөөс сэргийлэх, дархлаажуулалттай холбогдсон харилцааг зохицуулах зорилгоо биелүүлж, хангалттай хэмжээнд хэрэгжиж байна.
- Засгийн газрын дэмжлэг, оролцоо нэмэгдэж, Дархлаажуулалтын санд оруулах санхүүжилт тогтвортой нэмэгдсэн хэмээн дүгнэсэн юм.
Харин цаашид:
- Халдварт өвчнүүдийг устгасан, тархалтыг таслан зогсоосон амжилтаа бататгах,
- Вакцины хамралт өндөр байгаа өнөөгийн түвшнээ хадгалах,
- Эмч, мэргэжилтний мэдлэг, ур чадварыг тасралтгүй дээшлүүлэх,
- Дархлаажуулалтад шинэ вакцин нэвтрүүлэх шаардлагатай хэмээлээ.
