Эрүүл мэндийн яамнаас 2014 оныг “Эх, хүүхдийн эрүүл мэндийг дэмжих” жил болгон зарласан билээ. Уг ажлын хүрээнд Ховд хотноо “Эх, хүүхдийн тусламж, үйлчилгээний чанарыг сайжруулья” сэдэвт өрхийн эмч нарын бүсийн зөвлөлдөх уулзалт 2014 оны 09 дүгээр сарын 28-30-ны өдрүүдэд амжилттай зохион байгуулагдлаа.
Уг зөвлөлдөх уулзалтыг санаачлан зохион байгуулах, санхүүжүүлэхэд Норвегийн тусламжийн байгууллагын “Эрүүл мэндийн анхан шатны тусламж үйлчилгээг бэхжүүлэх-2” (ЭМАШТҮБ-2) төсөл тэргүүлэх үүргийг гүйцэтгэлээ. Зөвлөлдөх уулзалтад Эрүүл мэндийн яамны Эмнэлгийн тусламжийн хэлтсийн анхан шатны тусламжийн бодлогын хэрэгжилтийн зохицуулалт хариуцсан мэргэжилтэн, Анагаах ухааны доктор Р.Байгальмаа, ЭМАШТҮБ-2 төслийн удирдагч С.Баяржаргал нар оролцсоноос гадна Увс, Баян-Өлгий, Ховд, Завхан, Говь-Алтай аймгийн Эрүүл мэндийн газрын эмнэлгийн тусламжийн хэлтсийн даргаар ахлуулсан өрхийн эмч нар оролцлоо. Зөвлөлдөх уулзалтын нээлтэд Ховд аймгийн Засаг даргын Тамгын газрын дарга, ЭМАШТҮБ-2 төслийн удирдах зөвлөлийн дарга Б.Батмөнх оролцож, оролцогчдод баяр хүргэж амжилт хүслээ.
Эхний өдрийн уулзалтаар Өрхийн эрүүл мэндийн төвийн шинэчлэлийн стратеги, хэрэгжилтийг эрчимжүүлэх үйл ажиллагааны тухай, Эрүүл мэндийн яамнаас өрхийн эрүүл мэндийн талаар баримталж буй бодлогын талаар дэлгэрэнгүй мэдээллийг ЭМЯ-ны мэргэжилтэн Р.Байгальмаа хийж, аймгууд “Эх, хүүхдийн эрүүл мэндийг дэмжих жил”-ийн хүрээнд хийж буй ажлын талаараа 3-аас доошгүй илтгэл хэлэлцүүлэн, сайн туршлагуудаа дэлгэн танилцууллаа. Зөвлөлдөх уулзалтын дараагийн өдөр Ховд аймгийн өрхийн эрүүл мэндийн төвийн үйл ажиллагатай танилцаж, өрхийн эрүүл мэндийн төвийн үйл ажиллагаанд одоо болж байгаа сайн талууд, тулгамдаж буй бэрхшээл түүнийг хэрхэн шийдвэрлэх талаар оролцогчдыг бүлэг болгон ажиллуулж, зөвлөлдөх уулзалтаас гарах зөвлөмжийн төсөлд санал орууллаа. Энэхүү бүсийн зөвлөлдөх уулзалтаас гарах санал зөвлөмж нь бүх аймгуудын үйл ажиллагаанд хүрч танилцуулагдахаараа онцлог юм.
