Олон улсын ахмадын өдрийг угтан Геронтологийн Үндэсний Төв, Өвөрхангай аймгийн Эрүүл мэндийн газар, Өвөрхангай аймгийн Төгрөг сумын эрүүл мэндийн төвтэй хамтран “Сумын эрүүл мэндийн төвийн настанд үзүүлэх тусламжийг бэхжүүлье” сэдэвт сургалтыг энэ сарын 17-20-ны өдрүүдэд Өвөрхангай аймгийн Төгрөг суманд зохион байгуулав.
Тус аймгийн Эрүүл мэндийн газар “Эрүүл насжилт, настны эрүүл мэнд” үндэсний хөтөлбөрийг хэрэгжүүлэх ажлын хүрээнд Өвөрхангай аймгийн Бат-Өлзий сумын эрүүл мэндийн төвтэй хамтран настанд зориулсан “Амьдралыг чанаржуулах өдөр өнжүүлэх төв”-ийг шинээр санаачилж, үйл ажиллагааг амжилттай хэрэгжүүлж байна.
Өвөрхангай аймгийн Эрүүл мэндийн газрын Эмнэлгийн тусламжийн хэлтсийн дарга Ч.Таалай, Төгрөг сумын Иргэдийн төлөөлөгчдийн хурлын дарга Б.Баярсайхан, Геронтологийн үндэсний төвийн Эмнэлгийн тусламж, үйлчилгээний албаны дарга Б.Эрдэнэчимэг нар үг хэлж, сургалтын үйл ажиллагааг нээлээ.
Сургалтад Өвөрхангай аймгийн 17 сумын 68 эмч, эмнэлгийн мэргэжилтэн, жолооч болон настан оролцов. “Сумын эрүүл мэндийн төвийн настанд үзүүлэх тусламжийг бэхжүүлье” сэдэвт сургалтыг онол, дадлага, семинар хэлбэрээр зохион байгуулсан үр дүнтэй болжээ.
Мөн сургалтын хөтөлбөрийн хүрээнд Төгрөг сумын настнуудад “Цусны даралт ихсэх өвчнийг хянах, эмийн зохистой хэрэглээг төлөвшүүлэх”, “Эх хүүхдийн эрүүл мэндийг дэмжихэд-настны оролцоо” сэдвээр Геронтологийн үндэсний төвийн сургалтын баг сургалт явуулсан.
Сургалтын явцад “Агаарт хэмнэл”, ”Жавхаат хэмнэл” дасгалын үзүүлбэрийг сургалтын баг, сургалтад оролцогчидтой хамтран хийж, дасгал хөдөлгөөнөөр хичээллэв.
