Нийслэлийн эрүүл мэндийн байгууллагуудад эмнэлгийн тоног төхөөрөмж гардуулах үйл ажиллагаа өчигдөр /2014.09.23/ Эрүүл мэндийн яамнаа боллоо. Уг арга хэмжээнд Эрүүл мэндийн сайд Н.Удвал, ЭМЯ-ны Төрийн нарийн бичгийн дарга А.Эрдэнэтуяа, БХЗГ-ын дарга Я.Буянжаргал, Санхүү, эдийн засгийн хэлтсийн дарга Д.Төмөрбаатар, Оношилгоо, эмчилгээний технологийн хэлтсийн дарга Н.Гэрэлт-Од, Нийслэлийн эрүүл мэндийн газрын дарга Ш.Энхбат болон нийслэлийн эрүүл мэндийн байгууллагуудын дарга, эмч эмнэлгийн мэргэжилтнүүд, ханган нийлүүлэгч байгууллагын төлөөлөл оролцлоо.
Шинэчлэлийн Засгийн газрын 2012-2016 оны үйл ажиллагааны мөрийн хөтөлбөрт эрүүл мэндийн салбарын үндсэн зорилтыг “Шударга өрсөлдөөн, чөлөөт сонголтод суурилсан, олон улсын стандартад нийцсэн эрүүл мэндийн оношилгоо, эмчилгээ,үйлчилгээ авах боломжийг иргэн бүрд олгох” хэмээн тодорхойлж, “Эрүүл чийрэг Монгол хүн” хөтөлбөрийг хэрэгжүүлэхээр баталсан.
Энэхүү хөтөлбөрийг хэрэгжүүлэх үйл ажиллагааны 169 дүгээр заалтад “Эрүүл мэндийн салбарт тоног төхөөрөмж авах хөрөнгө оруулалтын хэмжээг үе шаттайгаар нэмэгдүүлж, жилд 30.0-50.0 тэрбум төгрөгт хүргэнэ” гэж заасан бөгөөд 2014 онд улсын төсвийн хөрөнгө оруулалтаар 22,2 тэрбум төгрөгийн эмнэлгийн тоног төхөөрөмж хангахаар төсөвлөсөн.
Үүнээс дүүргийн эрүүл мэндийн нэгдэл, нэгдсэн эмнэлгүүдэд шаардлагатай дижитал рентген аппарат, дижитал флюрографийн аппарат, тархины бичлэгийн аппарат, ЭХО аппарат, лабораторийн, мэс заслын, ариутгал, угаалгын тоног төхөөрөмжөөр хангахаар 2,3 тэрбум төгрөг төсөвлөсөнөөс эхний ээлжийн 24 нэр төрлийн 1,2 тэрбум төгрөгийн өртөг бүхий 79 ширхэг тоног төхөөрөмжүүдийг нийлүүлэхэд бэлэн болоод байна.
Мөн Эрүүл мэндийн сайдын 2014 оны 01 дугаар тушаалаар 2014 оныг “Эх, хүүхдийн эрүүл мэндийг дэмжих жил” болгон зарласантай холбоотойгоор нийслэлийн гурван амаржих газар, хүүхдийн төв сувилалд эх, нярайд шаардлагатай тоног төхөөрөмжөөр хангаж байна. Үүнд: нярайн инкубатор, нярайн амьсгалын аппарат, нярайн фото эмчилгээний аппарат, судас тодруулагч зэрэг тоног төхөөрөмж багтжээ.
2014 оны төвлөрсөн арга хэмжээний хөрөнгө оруулалтаас 9 дүүргийн 141 өрхийн эрүүл мэндийн төвүүдийг 16 нэр төрлийн 349,9 сая төгрөгийг өртөг бүхий түргэвчилсэн оношлуураар хангаад байна.
Мөн Эрүүл мэндийн яам энэ онд “Бүтээлч 12 ажил”-ыг төлөвлөн хэрэгжүүлж байгаагийн нэг нь өрхийн эрүүл мэндийн төвүүдийг цусны даралт хэмжих суурин автомат аппаратаар ханган, иргэд цусны даралтаа өөрсдөө хянах дадлыг олгох “Бүтээлч ажил -2” юм. Энэхүү ажлын хүрээнд улсын төсвийн хөрөнгө оруулалтаар 82,1 сая төгрөгийн өртөг бүхий “Цусны даралт хэмжих суурин автомат аппарат”, ширээ сандлын хамт дүүргийн өрхийн эрүүл мэндийн төвүүдийг хангаж, цусны даралтыг зөв хянах сургалт, суртчилгаа хийгдэж байна.
