“Нийгмийн эрүүл мэндийн ноцтой байдлын үеийн бэлэн байдал, хариу арга хэмжээ” сэдэвт зөвлөгөөн өнөөдөр Эрүүл мэндийн яамнаа эхэллээ.
Уг зөвлөгөөнд Үндэсний аюулгүй байдлын зөвлөл, Эрүүл мэндийн яам, Үйлдвэр хөдөө аж ахуйн яам, Батлан хамгаалах яам, Мэргэжлийн хяналтын ерөнхий газар, Онцгой байдлын ерөнхий газар, аймаг, нийслэлийн Эрүүл мэндийн газар, төв эмнэлэг, тусгай мэргэжлийн төвүүдийн төлөөлөл оролцож байна.
Хоёр өдрийн турш үргэжлэх энэхүү зөвлөгөөнөөр салбар хоорондын хамтын ажиллагааг сайжруулж, харилцан мэдээлэл солилцож, ямарваа нэгэн ноцтой нөхцөл байдал үүсэхэд цаг алдалгүй, тухайн тохиолдолд нийцсэн үр дүнтэй хариу арга хэмжээг хэрхэн авах, нийгмийн эрүүл мэндийн ноцтой нөхцөл байдлын үед хариу арга хэмжээний нэгдсэн хүрээг тодорхойлох талаар зөвлөлдөх юм.
“Нийгмийн эрүүл мэндийн ноцтой байдлын үеийн бэлэн байдал, хариу арга хэмжээ” зөвлөгөөнийг нээж, ЭМЯ-ны Бодлогын хэрэгжилтийг зохицуулах газрын дарга Я.Буянжаргал хэлсэн үгэндээ, “Шинэ болон сэргэж буй халдвараас гадна хүнсний аюулгүй байдал алдагдах, байгалийн гамшгийн давтамж нэмэгдэх, химийн хордлого гарах зэрэг нь хүн амын эрүүл мэндэд аюул учруулсаар байна. 1970 оноос хойш Эбола вирусын халдвар, шувууны томуу, амьсгалын цочмог халтай хам шинж, H1N1, H7N9, MERS-CoV зэрэг 40 гаруй халдвар шинээр бүртгэгдэж, нийгмийн эрүүл мэндэд ноцтой нөлөө үзүүлж, эрсдэл учруулсаар байна. Манай улсад сүүлийн жилүүдэд томуугийн цар тахал, үер, зуд, орчны бохирдол, хүнсний аюулгүй байдал зэрэг хүн амын эрүүл мэндэд нөлөөлж буй асуудлууд анхаарал татсаар байгаа. Дээрх нөхцөл байдлыг хянах, урьдчилан сэргийлэх, эрт илрүүлэх, шуурхай, үр дүнтэй хариу арга хэмжээг авч, бэлэн байдлыг хангах асуудал бидний өмнө чухлаар тавигдаж байна. Иймд Эрүүл мэндийн яамны дэргэд Олон улсын эрүүл мэндийн дүрэм, шинэ болон сэргэж буй халдварт өвчинтэй тэмцэх, сэргийлэх стратегийн хүрээнд нийгмийн эрүүл мэндийн ноцтой үйл явдал, халдварт өвчний дэгдэлт, цар тахал, гамшгийн бэлэн байдал, хариу арга хэмжээг шуурхай удирдан зохион байгуулах, шийдвэр гаргагчдыг үнэн зөв мэдээллээр хангах, салбарын болон салбар хоорондын үйл ажиллагааг уялдуулан зохицуулах үндсэн үүрэгтэй Шуурхай удирдлагын төвийг байгууллаа” хэмээн онцлов.
Аливаа байгалийн гамшиг болон бусад эрсдэлийг урьдчилан таамаглаж чадахгүй учраас бэлэн байдлын иж бүрэн тогтолцоог бүрдүүлснээр хүний амь нас, эдийн засаг, нийгэмд үзүүлэх хор нөлөөг багасгаж чадна. Бэлэн байдал, урьдчилан сэргийлэлтэд хөрөнгө оруулах нь зөвхөн хариу арга хэмжээнд мөнгө зарцуулахаас илүү үр дүнтэй.
ДЭМБ-ын Монгол дахь Суурин төлөөлөгч Др. Су Нюунт У, Монгол улс салбар хоорондын хамтын ажиллагаагаараа манай бүсэд төдийгүй олон улсад “Жишиг” болсон улс гэдгийг цохон тэмдэглээд цаашдаа энэ байдлаа улам сайжруулахыг хүслээ. Мөн тэрээр, “Өнөөдрийн зөвлөгөөнөөр бид тохиолдолд суурилсан менежментийн тогтолцоог хэрхэн бүрдүүлэх талаар голлон ярилцана. Хамгийн чухал нь тухай тохиолдолд таарсан, цаг үеэ олсон хариу арга хэмжээг аль салбарынхан авах вэ гэдгээ мэддэг байх нь чухал. H1N1 вирусын халдвар гарахад дэлхийн ямар ч өндөр хөгжилтэй улс орны бэлэн байдал 100 хувь байсан гэвэл үгүй юм. Тиймээс өвчин гарахаас урьдчилан сэргийлэх, дэгдэлтийн дараах арга хэмжээ гэх зэргээр тогтмол эрсдэлийн бэлэн байдлыг хангах дасгал сургуулилтыг хийж хэвшүүлэх хэрэгтэй” гэв.
